ԵՐԵՎԱՆ, 20 նոյեմբերի. /Նովոստի-Արմենիա/. Հայաստանի աշխատանքի և սոցիալական հարցերի նախարար Գևորգ Պետրոսյանի հրաժարականը վեճերի պատճառ է դարձել երկրի խորհրդարանական խմբակցությունների շրջանում ուրբաթ ճեպազրույցների ընթացքում:
«Բարգավաճ Հայաստան» կուսակցության անդամ հանդիսացող Հայաստանի աշխատանքի և սոցիալական հարցերի նախարար Գևորգ Պետրոսյանը նոյեմբերի 17-ին հրաժարականի մասին դիմում է ներկայացրել առողջական վիճակի բերումով: Մամուլում տեղ գտած հրապարակումների համաձայն «Բարգավաճ Հայաստան» կուսակցությունը դժգոհ է մնացել նրա աշխատանքից և ետ կանչել նրան:
Ինչպես ասաց «Ժառանգություն» ընդդիմադիր խորհրդարանական խմբակցության անդամ Լարիսա Ալավերդյանը, նախարարի հրաժարականը կառավարությանը կայուն աշխատելու հնարավորություն չի տալիս:
«Այդպես վարվել չի կարելի. նախարարի պաշտոնը քաղաքական պաշտոն է, այլ ոչ թե կուսակցական»,- հայտարարեց նա:
ՀՅԴ ընդդիմադիր կուսակցության ներկայացուցիչ Արա Նռանյանը նշեց, որ նախարարի հրաժարականի հարցը գտնվում է կառավարության և քաղաքական կուսակցությունների իրավասության տակ, որոնք էլ պետք է համապատասխան եզրակացություններ անեն:
«Յուրաքանչյուր քաղաքական ուժ ինքն է որոշում, ում նշանակել նախարարի պաշտոնում քաղաքական հեղինակությունը բարձր պահելու համար»,- հայտարարեց Նռանյանը:
«Բարգավաճ Հայաստան խմբակցությունից պատգամավոր Նաիրա Զոհրաբյանը հիշեցրեց, որ Պետրոսյանն ինքն է հրաժարականի դիմում ներկայացրել, և կուսակցությունը պաշտոնական հաղորդագրությանն ավելացնելու բան չունի:
Գևորգ Պետրոսյանը աշխատանքի և սոցիալական հարցերի նախարարի պաշտոնում աշխատեց ընդամենը կես տարի: Կուսակցության առաջնորդ Գագիկ Ծառուկյանի առաջարկով նախարարի պաշտոնի ամենահավանական թեկնածուն մարդու իրավունքների պաշտպանության մշտական խորհրդարանական հանձնաժողովի նախագահ Մխիթար Մնացականյանն է: -0-
