Դեմոկրատ Քրիս Մերֆին և հանրապետական Զաքա Ուոմպան միացել են ԱՄՆ Կոնգրեսի հայկական հարցերով զբաղվող խմբին, հաղորդում է Ամերիկայի հայկական համագումարը (ԱՀՀ):
Այժմ խմբի կազմում է 148 կոնգրեսական: Կոնգրեսական Մերֆին վերընտրվել է երկրորդ անգամ Քոննեքթիքութ նահանգից և Հայոց ցեղասպանության բանաձևի նախագծի համահեղինակներից է:
Կոնգրեսական Ուոմպան ևս Հայոց ցեղասպանության ճանաչման բանաձևի նախագծերից մեկի համահեղինակն է: Նա ներկայացուցիչների պալատի Հատկացումների կոմիտեի անդամ է:
Ամերիկայի հայկական համագումարը Ուոմպայի դերը համարում է բացառիկ Հայաստանի հուսալի ֆինանսավորման ապահովման տեսակետից, որն ուղղված է Թուրքիայի կողմից Հայաստանի շարունակվող շրջափակման տնտեսական հետևանքների փոխհատուցմանը:
«Ամերիկայի հայկական համագումարի ջանքերը շարունակում են իրենց պտուղները տալ Կապիտոլիումի բլրի վրա: Մենք հուսով ենք համագործակցել կոնգրեսականներ Մերֆիի ու Ուոմպայի հետ հայ-ամերիկյան հարաբերությունների հետագա ամրապնդման գործում», - ասել է ԱՀՀ-ի գործադիր տնօրեն Բրայան Արդունին:
Նա նշել է, որ Հայաստանը խիզախ քայլ է կատարել՝ մերձեցման գնալով Թուրքիայի հետ, և ԱՄՆ-ն կարևոր դեր է խաղում շրջափակման վերացման և առանց նախապայմանների հայ-թուրքական հարաբերությունների կարգավորման գործում:
1972 թ.-ին հիմնադրված Ամերիկայի հայկական համագումարը հայկական խոշոր լոբբիստական կազմակերպություն է Վաշինգտոնում, որի գործունեությունն ուղղված է հասարակական գիտակցության խթանմանն ու Հայոց հարցում իրազեկման բարձրացմանը:
Հայաստանի ու Թուրքիայի արտգործնախարարները հոկտեմբերի 10-ին Ցյուրիխի համալսարանում ստորագրեցին «Դիվանագիտական հարաբերությունների հաստատման մասին արձանագրությունը» և «Երկկողմ հարաբերությունների զարգացման մասին արձանագրությունը»: Փաստաթղթերը ստորագրումից հետո պետք է հավանության արժանանան երկու երկրների խորհրդարանների կողմից:
Հայաստանի և Թուրքիայի միջև չկան դիվանագիտական հարաբերություններ, իսկ 1993-ից, պաշտոնական Անկարայի նախաձեռնությամբ, փակ է հայ-թուրքական սահմանը։
Երկու եկրների միջև բարդ հարաբերությունները պայմանավորված են մի շարք հանգամանքներով, որոնք կապված են, մասնավորապես, Անկարայի՝ ադրբեջանական դիրքորոշման պաշտպանությամբ ղարաբաղյան հարցում, ինչպես նաև Թուրքիայի սուր արձագանքի հետ 1915 թվականին Օսմանյան կայսրությունում Հայոց ցեղասպանության միջազգային ճանաչման հետ կապված։ -0-
