Հայաստանի վերահսկիչն պալատն ու Լեհաստանի գերագույն վերահսկիչ պալատը հինգշաբթի Երևանում համագործակցության պայմանագիր են ստորագրել:
Պայմանագրով նախատեսվում է երկու մարմինների միջև փորձի փոխանակում, մասնագիտական պատրաստում և վերապատրաստում, ինչպես նաև համատեղ ստուգումների, սեմինարների, կոնֆերանսների և խորհրատվությունների անցկացում:
Հայաստանի վերահսկիչ պալատի նախագահ Իշխան Զաքարյանը ստորագրման արարողության ժամանակ նշեց, որ այդ պայմանագիրը մարտին Լեհաստան կատարած այցի ընթացքում ստորագրված մտադրությունների մասին արձանագրության բնական զարգացումն է:
Նա նաև տեղեկացրեց, որ համագործակցության պայմանագրի շրջանակներում՝ 2010 թ.-ին ծրագրվում է Հայաստանում համատեղ բնապահպանական հսկողությաւն անցկացնել:
«Լեհաստանի վերահսկիչ պալատն այս ոլորտում մեծ փորձ ունի, և այն համարվում է լավագույն կառույցը, որը Եվրոպայում վերահսկողություն է իրականացնում բնապահպանության ոլորտում», - նշեց Զաքարյանը:
Նա ավելացրեց, որ համատեղ ստուգումների անցկացման մասին պայմանավորվածություններ են ձեռք բերվել Գերմանիայի և Ռուսաստանի համապատասխան մարմինների արդեն, և շուտով նման պայմանավորվածություն կստորագրի նաև Նիդեռլանդների հետ:
Գերմանիայի հետ համատեղ վերահսկում կիրականացվի ճանապարհաշինության ոլորտում, իսկ Ռուսաստանի հետ վերահսկում կիրականացվի բյուջեից հատկացված՝ Հայաստանի սահմանային զորքերի համար նախատեսված միջոցների օգտագործման կապակցությամբ:
Զաքարյանի խոսքերով, հոլանդացի գործընկերների հետ ծրագրվում է վերահսկողություն իրականացնել հարկային և մաքսային ոլորտներում:
Լեհաստանի գերագույն վերահսկիչ պալատի նախագահ Յացեկ Եժիրսկին, ով Գերագույն վերահսկիչ մարմինների եվրոպական կազմակերպության (EUROSAI) ղեկավարն է, իր հերթին նշեց, որ EUROSAI-ը երկկողմ և բազմակողմ ստուգումների անցկացման մեծ փորձ ունի:
Նա նաև տեղեկացրեց, որ այժմ EUROSAI-ն աշխատում է կազմակերպության անդամ-երկրների վերահսկիչ պալատներում միջազգային չափանիշների ներդրման ուղղությամբ, որոնք հավանության են արժանացել Ֆինանսական վերահսկողության գերագույն մարմինների միջազգային կազմակերպության (INTOSAI) կողմից:-0-
