Հայ-թուրքական հարաբերությունների ջերմացումը կանդրադառնա նաև երկու երկրի մշակութային ոլորտի վրա. սոցիոլոգ

ԵՐԵՎԱՆ, 17 նոյեմբերի. /Նովոստի-Արմենիա/. Հայ-թուրքական հարաբերությունների ջերմացումը պետք է անդրադառնա նաև երկու երկրի մշակութային ոլորտի վրա, կարծում  է «Սոցիոմետր» սոցիոլոգիական հետազոտությունների անկախ կենտրոնի ղեկավար Ահարոն Ադիբեկյանը:

«Հաշվի առնելով այն, որ պատմագրությունը, մշակութաբանությունն այսօր քաղաքականության գերին են դարձել, կարելի է վստահեցնել, որ քաղաքական հարաբերությունների ցանկացած ջերմացում կանդրադառնա մշակութային ոլորտի վրա, և այդ համատեքստում հայ-թուրքական հարաբերությունները բացառություն չեն»,- ասաց Ադիբեկյանը:

Ադիբեկյանի խոսքով, երկու ժողովուրդն էլ այդ ոլորտում փոխըմբռնման և ոչ թե հակամարտության են ձգտում:

Սոցիոլոգն ընդգծեց, որ հայերը պետք է հոգ տանեն սեփական մշակութային ժառանգության հանդեպ, որպեսզի աշխարհին ճիշտ ներկայանալու հնարավորություն ունենան:

ՀՀ գեղարվեստի ազգային ակադեմիայի ռեկտոր Էդուարդ Սեդրակյանն իր հերթին նշեց, որ անթույլատրելի է հայ հասարակության մեջ տիրող անտարբերությունը:

«Անտարբերությունը կործանարար երևույթ է, այն կարող է սպանել մեր մշակույթն ու պատմությունը», նշեց նա:

Փորձագետի խոսքով, Հայաստանը պետք է ավելի ակտիվ լինի ու ավելի հաճախ աշխարհին ցուցադրի սեփական մշակութային ժառանգությունը:

Հայաստանի ու Թուրքիայի արտգործնախարարներ Էդվարդ Նալբանդյանն ու Ահմեդ Դավութօղլուն հոկտեմբերի 10-ին Ցյուրիխի համալսարանում ստորագրեցին «Դիվանագիտական հարաբերությունների հաստատման մասին արձանագրությունը» և «Երկկողմ հարաբերությունների զարգացման մասին արձանագրությունը»: Փաստաթղթերը ստորագրումից հետո պետք է հավանության արժանանան երկու երկրների խորհրդարանների կողմից:

Հայ-թուրքական սահմանը փակ է 1993 թ.-ից՝ պաշտոնական Անկարայի նախաձեռնությամբ: Երկու երկրների միջև բարդ հարաբերությունները պայմանավորված են մի շարք հանգամանքներով, որոնք կապված են, մասնավորապես, Անկարայի՝ ադրբեջանական դիրքորոշման պաշտպանությամբ ղարաբաղյան հարցում, ինչպես նաև Թուրքիայի սուր արձագանքի հետ 1915 թվականին Օսմանյան կայսրությունում Հայոց ցեղասպանության միջազգային ճանաչման հետ:--0—