ԵՐԵՎԱՆ, 18 նոյեմբերի. /Նովոստի-Արմենիա/. ՀՀ ԱԺ պատգամավորները չորքեշաբթի նիստի ժամանակ երկրորդ և վերջնական ընթերցմամբ փոփոխություններ ու լրացումներ մտցրեցին «Երեխայի իրավունքների մասին» օրենքում:
Ինչպես ասաց օրինագծի համահեղինակ, հայկական խորհրդարանի փոխխոսնակ Արևիկ Պետրոսյանը, ուղղումններով առաջարկվում է ընդլայնել երեխաների համար արգելված տեղեկատվության ու գրականության ցանկը:
Փոփոխություններով առաջարկվում է բռնություն, դաժանություն, մարդկային արժանապատվության ստորացում քարոզող, երեխայի վրա բացասաբար ազդող և հանցագործությունների դրդող տեղեկատվությունից ու գրականությունից բացի արգելել նաև այն նյութերը, որոնք բացասաբար են ազդում երեխայի առողջության, ֆիզիկական և մտավոր զարգացման, դաստիարակության վրա:
Ինչպես տեղեկացրեց Պետրոսյանը, փոփոխություններով աջաջարկվում է նաև արգելել հեռուստատեսությամբ այն հաղորդումների ցուցադրությունը, որոնք վարկաբեկում են ընտանիքի ինստիտուտը, նպաստում հանցագործությունների կատարմանը, ինչպես նաև սահմանափակել այն հեռուստառադիո հաղորդումների հեռարձակման ժամերը, որոնք կարող են բացասաբար ազդել երեխաների վրա: Հեղինակների առաջարկների համաձայն՝ նման հաղորդումները կարող են հեռարձակվել միայն գիշերային ժամերին՝ գիշերվա 12-ից մինչև առավոտյան 6-ը:
Հայ խորհրդարանականները քննարկման ժամանակ սատարեցին համահեղինակների առաջարկները՝ նշելով, որ հայկական հեռուստատեսությունում ներկայում նկատվում է այն հաղորդումների և ֆիլմերի գերակայությունը (այդ թվում հայրենական արտադրության սերիալների), որոնք բացասաբար են ազդում երեխաների վրա և հաճախ անբարոյական կենսաձև են քարոզում:
2009թ.-ի հուլիսի 1-ի դրությամբ Հայաստանում մինչև 18 տարեկան երեխաների թիվը շուրջ 900 հազար է կազմում այն դեպքում, երբ Հայաստանի բնակչության ողջ քանակը 3 մլն 240,7 հազար մարդ է: -0-
