Հայաստանի բանկային համակարգի միջոցով Ռուսաստանից ֆիզիկական անձանց անունով 2009 թ.-ի հունվար-սեպտեմբերին ստացվել է 629,1 միլիոն դոլար

Ընթացիկ տարվա հունվար-սեպտեմբերին Հայաստանի բանկային համակարգի միջոցով Ռուսաստանից ֆիզիկական անձանց անունով ստացվել է 629,1 միլիոն դոլարի ոչ կոմերցիոն բնույթի միջոց, ինչը 37,3 տոկոսով պակաս է 2008 թ.-ի նույն ժամանակահատվածի համեմատ (1003 միլին դոլար):

Այս մասին ասվում է ՀՀ Կենտրոնական բանկի ամենամսյա տեղեկատվական ամփոփագրում:

Միաժամանակ միայն սեպտեմբերին այդ ցուցանիշը կազմել է 93,7 միլիոն դոլար կամ ֆիզիկական անձանց հաշվին ստացված բոլոր միջոցների 82,1 տոկոսը:

Միաժամանակ 2009 թ.-ի հունվար-սեպտեմբերին Հայաստանից Ռուսաստան փոխանցվել է 68,1 միլին դոլար 2008 թ.-ի նույն ժամանակահատվածի 87,5 միլիոն դոլարի համեմատ (22,2 տոկոսի կրճատում):

Արդյունքում ընթացիկ տարվա հաշվետու ժամանակահատվածում Ռուսաստանից ստացված միջոցների մաքուր հոսքը կազմել է 561,1 միլիոն դոլար նախորդ տարվա նույն ժամանակահատվածի 915,4 միլիոն դոլարի համեմատ, այսինքն անկումը կազմել է 38,7 տոկոս:

Փաստորեն, Ռուսաստանին բաժին է ընկել Հայաստան ֆիզիկական անձանց հաշվին փոխանցվող ոչ կոմերցիոն բնույթի բոլոր միջոցների 80 տոկոսը կամ երկրից կատարված բոլոր փոխանցումների 50,7 տոկոսը, իսկ Ռուսաստանի մասնաբաժինը Հայաստան փոխանցվող միջոցների մաքուր հոսքում հունվար-սեպտեմբերին կազմել է 86 տոկոս:

2008 թ.-ի նույն ժամանակահատվածում այդ ցուցանիշները կազմել են. համապատասխանաբար, 83,2, 50,2 և 88,8 տոկոս (1 դոլարը 387,48 դրամ է):-0-