Հայաստանի նախագահը ստորագրեց «Նոր միջուկային էներգաբլոկի կառուցման մասին» օրենքը

Հայաստանի նախագահ Սերժ Սարգսյանը ստորագրեց «Նոր միջուկային էներգաբլոկ(ներ)ի կառուցման մասին» օրենքը, «Նովոստի-Արմենիա» գործակալությանը հայտնեցին երկրի ղեկավարի մամուլի ծառայությունից:

Խորհրդարանի կողմից հոկտեմբերի 27-ին ընդունված օրինագիծը նախատեսում է 1,2 հազար ՄՎտ հզորությամբ նոր ատոմային էներգաբլոկի (բլոկերի) կառուցման հնարավորությունը, որի շահագործման ժամկետը կկազմի 60 տարի:

Փաստաթղթով նաև սահմանվում են նման օբյեկտների կառուցման համար նախատեսված տարածքի և բլոկի (բլոկերի) պատրաստման, կառուցման, շահագործման և անվտանգության նկատմամբ հիմնական պահանջները, սահմանվում են իրականացվող աշխատանքների մասին բնակչությանն իրազեկելու ՀՀ կառավարության պարտավորությունները:

Հայաստանում նոր ատոմային էներգաբլոկի կառուցման համար, նախնական տվյալներով, կպահանջվի շուրջ 4-5 միլիարդ դոլար, իսկ կառուցման հստակ արժեքը կախված է էներգաբլոկի հզորությունից և հայտնի կդառնա անհրաժեշտ բոլոր ուսումնասիրությունների ավարտից հետո:

Ինչպես ավելի վաղ հայտնել էր էներգետիկայի նախարար Արմեն Մովսիսյանը, 1-1,2 հազար ՄՎտ հզորությամբ նոր էներգաբլոկի պատրաստման և կառուցման գործընթացի ճիշտ կազմակերպման դեպքում նախագծի ֆինանսավորման հետ կապված խնդիրներ չեն ծագի:

Նախարարը նաև նշել էր, որ անցկացված բոլոր նախնական ուսումնասիրությունները ցույց են տվել, որ առավել օպտիմալ տարբերակ է նոր էներգաբլոկի (բլոկերի) կառուցումը՝ գործող հայկական ԱԷԿ-ի հիման վրա, առավել ևս, որ նրա հզորությունը 400 ՄՎտ- է այն դեպքում, երբ կայանի տարածքը նախատեսում է 1,2 հազար ՄՎտ հզորությամբ բլոկի շահագործման հնարավորություն:

Մեծամոր քաղաքում գործող հայկական ԱԷԿ-ը շահագործման է հանձնվել 1976-ին։ Ներկայում գործում է կայանի միայն երկրորդ բլոկը՝ 407,5 ՄՎտ հզորությամբ:

ԱԷԿ-ի ֆինանսական հոսքերը 2003-2013թթ. հանձնված են «ԻՆՏԵՐ ՌԱՈ ԵԷՍ» ՓԲԸ-ի հավատարմագրային կառավարմանը, որի սեփականատերը ռուսական «Ռոսատոմ» պետական կորպորացիան է։ Հայկական ԱԷԿ-ը, մասնագետների գնահատականներով, կարող է գործել մինչև 2016թ.-ը:--0—