ԵՐԵՎԱՆ, 17 նոյեմբերի. /Նովոստի-Արմենիա/. Հայ հեռուստադիտողը մեծամասամբ նախընտրում է ազգային արտադրանքը, ասաց ՌԴ նախագահի Միջազգային մշակութային համագործակցության գծով հատուկ ներկայացուցիչ, հատուկ հանձնարարություններով դեսպան, «Ռուսական հեռուստատեսության ակադեմիա» հիմնադրամի նախագահ Միխայիլ Շվիդկոյը:
«Այսօր Հայաստանում փոխվել է հայկական հեռուստատեսություն դիտելու կառուցվածքը, և հայ հեռուստադիտողը մեծամասամբ նախընտրում է ազգային արտադրանքը»,- երեքշաբթի լրագրողներին ասաց Շվիդկոյը:
Նրա խոսքերով՝ հայ հանդիսատեսը դիտում է մինչև 60 տոկոս ազգային սերիալները, որոնք դուրս են մղում ռուսական սերիալները:
Ընդ որում Շվիդկոյը նշեց, որ վերջին երկու-երեք տարում փոխվել է հեռուստատեսության կառուցվածքը, այդ իսկ պատճառով այստեղ խելամիտ կլիներ մտածել կամ համարտադրանքի, կամ լրագրողների նորմալ վերապատրաստման կամ պատրաստման մասին:
«Հիմնական խնդիրն այն է, որ տաղանդավոր մարդիկ շատ են, իսկ տեխնոլոգիապես այդ մարդիկ պատրաստ չեն այն փոփոխություններին, որոնք տեղի են ունենում ժամանակակից աշխարհում»,- պարզաբանեց նա:
Հիմնադրամի ղեկավարը նշեց, որ հաջորդ տարի Ռուսաստանում հայկական հեռուստատեսության օրերի ժամանակ անդրադարձ կլինի համագործակցության ու զարգացման տարբեր մոտեցումներին, քանի որ Ռուսաստանում շուրջ 2,5 մլն հայեր են ապրում, այդ իսկ պատճառով խելամիտ կլիներ հարաբերություններ հաստատել տարածաշրջանային հեռուստատեսային ընկերությունների հետ, ինչը մեծ հնարավորություններ կբացի բազմակողմանի զարգացման համար:
Հայաստանում նոյեմբերի 16-19-ը ռուսական հեռուստատեսության օրեր են անցկացվում: Ռուսական պատվիրակության կազմում են Ռուսաստանի Դաշնության նախագահի միջազգային մշակութային համագործակցության հարցերի հատուկ ներկայացուցիչ, հատուկ հանձնարարություններով դեսպան Միխայիլ Շվիդկոյը, Ռուսաստանի Առաջին ալիքի Լրատվական ծրագրերի տնօրինության գլխավոր տնօրենի տեղակալ Կիրիլ Կլեյմենովը, մեկնաբան Անդրեյ Կոնդրաշովը, հեռուստահաղորդավարուհի Արինա Շարապովան, ինչպես նաև Ռուսաստանում Հայաստանի դեսպան Արմեն Սմբատյանը:
Պատվիրակության այցի ընթացքում ծրագրվում է «Ռուսական հեռուստատեսության ակադեմիա» հիմնադրամի և հայկական չորս առաջատար հեռուստաալիքների՝ Հայաստանի հանրային հեռուստատեսության, Հայկական երկրորդ հեռուստաալիքի, ինչպես նաև «Արմենիա» և «Շանթ» հեռուստաալիքների միջև «Համագործակցության և փոխըմբռնման հուշագրի» ստորագրում:-0-
