Երևանում մեկնարկեցին հայոց լեզվի դասընթացները օտարերկրյա դիվանագետների և նրանց ընտանիքների համար:

Երևանում երեքշաբթի մեկնարկեցին հայոց լեզվի դասընթացները օտարերկրյա դիվանագետների և նրանց ընտանիքների համար:

Ինչպես «Նովոստի-Արմենիա» գործակալությանը հայտնեցին Հայաստանի ԱԳՆ-ից, դասընթացները կազմակերպել է ՀՀ արտգործնախարարի տիկնոջ՝ Նատալյա Նալբանդյանի գլխավորած «Բարի գալուստ Հայաստան» ասոցիացիան:

Հաղորդագրության համաձայն՝ առաջին դասընթացին ներկա էին երկու տասնյակից ավելի դիվանագետներ և նրանց ընտանիքների անդամներ: 

«Հայոց լեզվի դասընթացները Հայաստանում ապրող օտարերկրացիների համար լավ հնարավորություն են առավել մոտիկից ծանոթանալու հայ ժողովրդի պատմությանը, մշակույթին և ավանդույթներին»,- ասվում է հաղորդագրության մեջ:

Այս տարվա սեպտեմբերին հիմնադրված ասոցիացիան շահույթ չհետապնդող կազմակերպություն է, որի նպատակն է դյուրացնել արտասահմանցի դիվանագետների և նրանց ընտանիքների ինտեգրումը հայաստանյան կյանք: --0--