Երեքշաբթի Երևանում «Ռուսական հեռուստատեսության ակադեմիա» հիմնադրամի ու հայկական չորս հեռուստաալիքի միջև համագործակցության հուշագիր ստորագրվեց:
Ռուսական կողմից փաստաթուղթը ստորագրեց ՌԴ նախագահի միջազգային մշակութային համագործակցության գծով հատուկ ներկայացուցիչ, հատուկ հանձնարարություններով դեսպան Միխայիլ Շվիդկոյը, իսկ հայկական կողմից՝ Հայաստանի հանրային հեռուստատեսության ղեկավար Արմեն Արզումանյանը, Հայկական երկրորդ հեռուստաալիքի գործադիր տնօրեն Սամվել Մայրապետյանը, «Արմենիա» և «Շանթ» հեռուստաալիքների ղեկավարներ Գառնիկ Մկրտչյանն ու Արթուր Եզեկյանը:
Ինչպես փաստաթղթի ստորագրումից հետո հայտարարեց «Ռուսական հեռուստատեսության ակադեմիա» հիմնադրամի նախագահ Միխայիլ Շվիդկոյը, հուշագրի նպատակն այնպիսի նախագծերի իրագործումն է, որոնք անհրաժեշտ են երկու կողմերին էլ հայկական և ռուսական հեռուստաալիքների համագործակցության և զարգացման գործում:
«Տվյալ դեպքում խոսքն, առաջին հերթին, հայկական և ռուսական հեռուստատեսային լրագրողների և մասնագետների ստաժավորման և, բնականաբար, հնարավոր արտադրությունների և վերարտադրությունների մասին է», - երեքշաբթի լրագրողներին ասաց Շվիդկոյը:
Նրա խոսքերով, ստորագրված հուշագրի շրջանակներում ամեն տարի Ռուսաստանում ստաժավորում կանցնեն հուշագիրը ստորագրած հեռուստաալիքների 20 հայ լրագրող, հեռուստատեսային մասնագետ և օպերատոր:-0-
