Հայ խորհրդարանականները խստացրել են լրագրողների մասնագիտական գործունեությանը խոչընդոտելու համար նախատեսված պատժամիջոցները

ՀՀ ԱԺ պատգամավորները երեքշաբթի նիստի ժամանակ առաջին ընթերցմամբ փոփոխություններ են մտցրել ՀՀ քրեական օրենսգրքում, որոնք ուղղված են լրագրողների շահերի պաշտպանությանը:

Ինչպես տեղեկացրեց օրինագծի հեղինակներից մեկը՝ պատգամավոր Հովհաննես Մարգարյանը, փոփոխություններով նախատեսվում է նոր կետ ավելացնել ՀՀ ՔՕ 164-րդ հոդվածում (լրագրողի մասնագիտական օրինական գործունեությանը խոչընդոտելը):

Ինչպես նշեց Մարգարյանը, նոր կետով պատասխանատվություն է սահմանվում լրագրողի կամ նրա ընտանիքի անդամների նկատմամբ բռնություն կիրառելու և բռնության սպառնալիք ներկայացնելու համար՝ լրագրողի օրինական մասնագիտական գործունեությանը խոչընդոտելու նպատակով, կամ նրան ստիպելու տարածել կամ հրաժարվել տարածել տեղեկատվություն:

Նման գործողությունների համար նախատեսվում է 200 հազար դրամից (շուրջ 520 դոլար) մինչև 400 հազար դրամի (շուրջ 1035 դոլար) տուգանք, կամ մինչև երկու տարի ուղղիչ աշխատանքներ, կամ մինչև հինգ տարի ազատազրկում:

Միաժամանակ Մարգարյանն ասաց, որ նման փոփոխությունների անհրաժեշտությունը հասունացել է, քանի որ մի շարք հասարակական կազմակերպությունների տվյալների համաձայն, Հայաստանում վերջին տարիներին ավելացել է լրագրողների նկատմամբ բռնության դեպքերի և նրանց մասնագիտական գործողություններին խոչընդոտելու փորձերի թիվը:

Պատգամավորի խոսքերով, դա ապացուցում է, որ լրագրողների իրավունքների և շահերի պաշտպանության աստիճանը դեռևս պատշաճ մակարդակի վրա չէ, և հասունացել է պատժամիջոցների խստացման միջոցով նրանց պաշտպանության անհրաժեշտությունը:-0-