ՀՀ պետական եկամուտների կոմիտեի աշխատակից Վահե Դավթյանը կալանավորվել է ալկոհոլային հարբածության վիճակում մեքենա վարելու և ճանապարհային երթևեկության կանոնները խախտելու համար, որը հանգեցրել է երկու մարդու մահվան, «Նովոստի-Արմենիա» գործակալությանը տեղեկացրեցին ՀՀ հատուկ քննչական ծառայությունից:
Տեղեկատվության համաձայն, հոկտեմբերի 9-ին Դավթյանը, լինելով միջին աստիճանի ալկոհոլային հարբածության վիճակում, գիշերային ակումբներից մեկից իր ծանոթուհուն տուն տանելու ճանապարհին նստել է մեքենայի ղեկին՝ խախտելով ճանապարհային երթևեկության մի շարք կանոններ, ինչը հանգեցրել է երկու մարդու մահվան:
Մասնավորապես, մամուլի հաղորդագրության մեջ նշվում է, որ անթույլատրելի արագությամբ մեքենան վարելիս՝ Դավթյանը հատել է Գայի պողոտա և Ն.Ստեփանյան փողոցի խաչմերուկը կարմիր լույսի տակ և բախվել է տաքսի ավտոմեքենային, որի վարորդն ու ուղևորը տեղում մահացել են: Բացի այդ, Դավթյանի մեքենան բախվել է ևս երեք մեքենայի:
Նախաքննությամբ ձեռք բերված ապացույցների հիման վրա, Վահե Դավթյանին մեղադրանք է առաջադրվել ՀՀ քրեական օրենսգրքի 242-րդ հոդվածի 3-րդ մասով (Ճանապարհային երթևեկության և տրանսպորտային միջոցների շահագործման կանոնները խախտելը, որն անզգուշությամբ առաջացրել է երկու կամ ավելի մարդու մահ)։ Նախաքննությունը շարունակվում է:-0-
