Խոզագրիպը Հայաստան է ներթափանցել հիմնականում Ռուսաստանից. ՀՀ առողջապահության նախարարություն

ԵՐԵՎԱՆ, 16 նոյեմբերի. /Նովոստի-Արմենիա/. Հայաստանում խոզի գրիպի հիվանդացության բոլոր դեպքերը կապված են դրսից, մեծամասամբ Ռուսաստանից վիրուսի ներթափանցման հետ, հաղորդում է ՀՀ առողջապահության նախարարությունը:

Նոյեմբերի 13-ի դրությամբ  Հայաստանի Հանրապետությունում արձանագրվել է A/H1N1 գրիպով կասկածելի 11 հիվանդ, բոլոր դեպքերը բերովի են` 7-ը Ռուսաստանից, 2-ը` Իրանի Իսլամական Հանրապետությունից և 1-ը` Թուրքիայից, հիվանդներից 1-ը կոնտակտավոր է:

ՀՀ առողջապահության նախարարության ներկայացուցչի տվյալներով, չորս հիվանդ միևնույն ընտանիքի անդամներ են: Օմսկից վերադառնալուց հետո տղամարդու մոտ հետազոտության արդյունքում խոզի գրիպ է հայտնաբերվել, սակայն այդ ժամանակ նա արդեն հասցրել է վարակել իր ընտանիքի անդամներին:

Լաբորատոր հետազոտության համար վերցված նմուշները ուղղարկվել են Լոնդոնի ռեֆերենս լաբորատորիա:

Հանրապետությունում շարունակվում է վարակի հետագա ներբերման և տարածման կանխարգելմանն ուղղված հակահամաճարակային միջոցառումների իրականացումը: Շարունակվում է ուղևորների առողջության նկատմամբ մոնիթորինգի իրականացումը:

Խոզի գրիպով վարակված 11 հիվանդներից ութը բուժում են ստանում «Նորք» ինֆեկցիոն հիվանդանոցում, իսկ երեք մարդ արդեն է դուրս է գրվել հիվանդանոցից:-0-