Ամերիկայի հայկական համագումարը ողջունում է Հայոց ցեղասպանության հարցում սենատոր Մաքքեյնի դիրքորոշումը

ԱՄՆ-ի հայկական խոշորագույն լոբբիստական կազմակերպություններից մեկը՝ Ամերիկայի Հայկական Համագումարը, հայտարարություն է տարածել, որում ողջունում է Օսմանյան կայսրությունում Հայոց ցեղասպանության խնդրի և հայ-թուրքական հարաբերությունների կարգավորման գործընթացի կապակցությամբ հանրապետական-սենատոր Ջոն Մաքքեյնի դիրքորոշումը:

Ինչպես նշվում է «Նովոստի-Արմենիա» գործակալությանը տրամադրած տեղեկատվության մեջ, «Ամերիկայի ձայնի» վրացական ծառայությանը տված հարցազրույցի ժամանակ սենատոր Մաքքեյնը ճանաչել է Հայոց ցեղասպանությունը, ինչպես նաև իր աջակցությունն է հայտնել հայ-թուրքական հարաբերությունների կարգավորման կապակցությամբ:

«Մենք հստակ հավատում ենք, որ Միացյալ Նահանգների կողմից Հայոց ցեղասպանության փաստի ճանաչումը չպետք է դառնա հայ-թուրքական հարաբերությունների կարգավորման գործընթացի գերին և ողջունում ենք սենատոր Մաքքեյնի հայտարարությունը», - հայտարարել է Ամերիկայի Հայկական Համագումարի գործադիր տնօրեն Բրայան Արդունին:

Նա ավելացրել է, որ Համագումարը բազմաթիվ անգամ իր աջակցությունն է հայտնել Հայաստանի և Թուրքիայի միջև առանց նախապայմանների հարաբերությունների կարգավորման գործընթացին:

Ամերիկայի Հայկական Համագումարի՝ Սենատոր Մաքքեյնին ուղղված նամակում Արդունին ընդգծել է Հայոց ցեղասպանության ճանաչմանն ուղղված ԱՄՆ ջանքերի ակտիվացման անհրաժեշտությունը: 1972թ.-ին ստեղծված Ամերիկայի Հայկական Համագումարը խոշորագույն հայկական հասարակական կազմակերպությունն է:

Հայոց մեծ եղեռնը 20-րդ դարի առաջին ցեղասպանությունն է, որը կազմակերպվել և ծրագրավորված իրագործվել է երիտթուրքական կառավարության կողմից, ինչի հետևանքով Օսմանյան կայսրության կազմի մեջ մտնող Արևմտյան Հայաստանում, սրի է քաշվել ավելի քան 1,5 մլն հայ։

Հայոց ցեղասպանության փաստը ճանաչել են բազմաթիվ երկրներ, մասնավորապես, Ուրուգվայը, Լիտվան, Ռուսաստանը, Ֆրանսիան, Իտալիայի խորհրդարանի ստորին պալատը, ԱՄՆ-ի մեծ թվով նահանգներ, ինչպես նաև Հունաստանի, Կիպրոսի, Արգենտինայի, Բելգիայի, Ուելսի խորհրդարանները, Շվեյցարիայի ազգային խորhուրդը, Կանադայի խորհրդարանի համայնքների պալատը և Լեհաստանի սեյմը։

Հայաստանի և Թուրքիայի արտգործնախարարները հոկտեմբերի 10-ին Ցյուրիխի համալսարանում ստորագրեցին «Դիվանագիտական հարաբերությունների հաստատման մասին արձանագրությունը» և «Երկկողմ հարաբերությունների զարգացման մասին արձանագրությունը»: -0-