Հայաստանի իրավապահ մարմինները միջոցառումների ծրագիր են մշակում հայ-թուրքական սահմանի բացման դեպքում

Հայաստանի իրավապահ մարմինները միջոցառումների ծրագիր են մշակում հայ-թուրքական սահմանի բացման դեպքում հանցագործությունների թվի աճի կանխարգելման նպատակով, հինգշաբթի լրագրողներին հայտնեց Հայաստանում Ինտերպոլի ազգային կենտրոնական բյուրոյի պետ, գնդապետ Վարդան Եղիազարյանը։

«Ներկայում մենք օպերատիվ այլ ծառայությունների հետ համատեղ միջոցառումների ծրագրեր ենք մշակում, որոնք սահմանի բացման դեպքում թույլ կտան կանխարգելիչ միջոցառումների ապահովումը»,- ասաց նա։

ԱԿԲ պետը նշեց, որ Ոստիկանության գործողությունները կլինեն կառավարության կողմից սահմանի բացման դեպքում նախատեսվող միջոցառումների ընդհանուր փաթեթի մի մասը։

Եղիազարյանի խոսքերով, ԱԿԲ-ն մտահոգված է սահմանի բացման կապակցությամբ հանցագործությունների թվի աճի, մասնավորապես, ահաբեկիչների հնարավոր ներհոսքի, թմրանյութերի անօրինական շրջանառության ավելացման, թրաֆիքինգի դեպքերի առիթով։

Եղիազարյանը նշեց, որ ԱԿԲ-ն արդեն քննարկել է այս հարցը ոստիկանության ղեկավարության հետ։

Նա ավելացրեց նաև, որ պետք է բարձրացնել ոչ միայն հայ-թուրքական սահմանի, այլ նաև Հայաստանի մյուս սահմանների պաշտպանվածությունը։ Մեծ դեր այստեղ կարող է խաղալ, նրա կարծիքով, Ինտերպոլի նոր «I-24/7» հեռահաղորդակցական համակարգը, որը մինչև 2009 թվականի ավարտը կընդգրկի սահմանային բոլոր կետերը։

Հայաստանի և Թուրքիայի արտգործնախարարները հոկտեմբերի 10-ին Ցյուրիխի համալսարանում ստորագրեցին «Դիվանագիտական հարաբերությունների հաստատման մասին արձանագրությունը» և «Երկկողմ հարաբերությունների զարգացման մասին արձանագրությունը»: Փաստաթղթերը ստորագրումից հետո պետք է հավանության արժանանան երկու երկրների խորհրդարանների կողմից:

Հայաստանի և Թուրքիայի միջև չկան դիվանագիտական հարաբերություններ, իսկ 1993-ից, պաշտոնական Անկարայի նախաձեռնությամբ, փակ է հայ-թուրքական սահմանը։

Երկու երկրների միջև բարդ հարաբերությունները պայմանավորված են մի շարք հանգամանքներով, որոնք կապված են, մասնավորապես, Անկարայի՝ ադրբեջանական դիրքորոշման պաշտպանությամբ ղարաբաղյան հարցում, ինչպես նաև Թուրքիայի սուր արձագանքի հետ 1915 թվականին Օսմանյան կայսրությունում Հայոց ցեղասպանության միջազգային ճանաչման հետ կապված։ -0-