ԵՐԵՎԱՆ, 12 նոյեմբերի. /Նովոստի-Արմենիա/. Հայաստանի մարդու իրավունքների պաշտպան Արմեն Հարությունյանը աշխատանքային խմբով մեկնել է Հայաստանի Լոռու մարզ, տեղեկացնում է Պաշտպանի գրասենյակի մամուլի ծառայությունը: Այցելության հիմնական նպատակը մարզում մարդու իրավունքների պաշտպանության խնդիրների ուսումնասիրությունն էր և Պաշտպանին հասցեագրված դիմում-բողոքների վերաբերյալ տեղում պարզաբանումներ ստանալը:
Ինչպես նշվում է հաղորդագրության մեջ, Պաշտպանի առաջին հանդիպումը կայացավ Հելսինկյան քաղաքացիական ասամբլեայի Վանաձորի գրասենյակում, որտեղ հանդիպմանը մասնակցում էր կազմակերպության ղեկավար Արթուր Սաքունցը և մի շարք այլ հասարակական կազմակերպությունների և ԶԼՄ-ների ներկայացուցիչներ:
Հանդիպման ընթացքում ՀԿ-ների կողմից Պաշտպանի ուշադրությանը ներկայացվեցին Վանաձորի տնակային ավանի իրացման հետ կապված խնդիրները, շինարարական մրցույթների և հողերի տրամադրման գործընթացների թափանցիկության խնդիրները, մարզում գործող երեխաների խնամքի երեք հաստատությունների գործունեությունը, ՀՀ Ոստիկանության Սպիտակի բաժնում տեղի ունեցած խոշտանգման դեպքը, զինվորական զորակոչի խնդիրները, հասարակական կազմակերպությունների մասին օրենքի նախագիծը և մի շարք այլ խնդիրներ:
ՀԿ-ների մասին օրենքի նախագծի վերաբերյալ Պաշտպանը նշեց, որ այդ խնդիրը քննարկվել է Արդարադատության նախարարի հետ, ըստ որի այդ նախագիծը ներկայացվել է ԵԽ Վենետիկի հանձնաժողովին` կարծիք ստանալու նպատակով, ինչպես նաև առաջիկայում նախատեսվում է կազմակերպել քննարկում բոլոր շահագրգիռ կողմերի մասնակցությամբ, որտեղ ՀԿ-ներին հնարավորություն կտրվի ներկայացնել իրենց մտահոգությունը:
ՀԿ-ների կողմից բարձրացված բոլոր խնդիրները Պաշտպանը քննարկեց Լոռու մարզպետ Արամ Քոչինյանի և Վանաձորի քաղաքապետ Սամվել Դարբինյանի հետ: Մարզպետի և Քաղաքապետի հետ հանդիպումների ընթացքում ներկա էին մարզպետարանի և քաղաքապետարանի համապատասխան ստորաբաժանումների ղեկավարները, որոնց հետ ձերք բերվեց պայմանավորվածություն հաջորդող երկու օրերի ընթացքում մանրամասն քննարկել բոլոր բարձրացմած խնդիրները Պաշտպանի աշխատանքային խմբի ներկայացուցիչների հետ:
Պաշտպանի կողմից ստեղծված աշխատանքային խումբը հաջորդ երկու օրերի ընթացքում իրականացնելու է այցելություններ և ուսումնասիրություններ Լոռու մարզի Ոստիկանության բաժիններում, զորամիավորումներում, քրեակատարողական հիմնարկներում, ինչպես նաև Սպիտակի Ոստիկանության բաժանմունքում: Այցելության արդյունքների վերաբերյալ լրացուցիչ տեղեկատվությունը կներկայացվի աշխատանքային խմբի վերադառնալուց հետո: -0-
