ԵՐԵՎԱՆ, 12 նոյեմբերի. /Նովոստի-Արմենիա/. Նախագահ Սերժ Սարգսյանը հինգշաբթի ընդունել է Հայաստանում Միավորված ազգերի կազմակերպության մշտական համակարգող, ՄԱԿ-ի զարգացման ծրագրի մշտական ներկայացուցիչ Կոնսուելո Վիդալին, ով ավարտում է իր առաքելությունը մեր երկրում։
Ինչպես «Նովոստի-Արմենիա» գործակալությանը հայտնեցին հայկական պետության ղեկավարի մամուլի ծառայությունից, նախագահը երախտագիտություն է հայտնել տիկին Վիդալին, պաշտոնավարման չորս տարիների ընթացքում կատարած աշխատանքի և Հայաստանի զարգացման ծրագրերին օժանդակելու համար:
Մեծ նշանակություն տալով ՄԱԿ-ի տարբեր գործակալությունների կողմից իրականացվող ծրագրերին` նախագահ Սարգսյանն ասել է. «Խոսքն այստեղ միայն ֆինանսական միջոցների մասին չէ, շատ ավելի կարևոր են փորձը, ներգրավվածությունն ու համեմատվելու հնարավորությունը»:
Կոնսուելո Վիդալն իր հերթին շնորհակալություն է հայտնել ՄԱԶԾ-Հայաստան գերազանց փոխգործակցության համար:
Նա ասել է, որ հեռանում է հիանալի հիշողություններով և մշտապես կմնա Հայաստանի բարեկամը:
Զրուցակիցները մտքեր են փոխանակել նաև ՀՀ տարածքների համաչափ զարգացման, հաջորդ տարի նախատեսվող մարդահամարի կազմակերպման հարցերի շուրջ:
ՄԱԿ-ի մշտական համակարգողն ուշագրավ է համարել Հայաստանի օրինակը, որ տնտեսության վրա թեև գլոբալ ֆինանսատնտեսական ճգնաժամը մեծ ազդեցություն է ունեցել, այնուամենայնիվ սոցիալական ծրագրերը լիովին պահպանվել են: -0-
