ԵՐԵՎԱՆ, 11 նոյեմբերի. /Նովոստի-Արմենիա/. «Սահմանադրական իրավունք» Միություն» կուսակցությունը կողմ է հանդես գալիս հայ-թուրքական սահմանի բացմանը, չորեքշաբթի հայտարարեց կուսակցության առաջնորդ Հայկ Բաբուխանյանը։
2009թ. հոկտեմբերի 10-ին Հայաստանի և Թուրքիայի միջև ստորագրվեցին երկկողմ կապերի և դիվանագիտական հարաբերությունների կարգավորման վերաբերյալ արձանագրություններ, որից հետո երկու երկրի խորհրդարանները պետք է վավերացնեն դրանք:
«Եթե հայ-թուրքական արձանագրությունները վավերացվեն Թուրքիայի խորհրդարանի կողմից, ապա Հայաստանի խորհրդարանը նույնպես պետք է վավերացնի այդ փաստաթղթերը»,- ասաց նա։
Սակայն, արձանագրությունների վավերացմանը զուգահեռ, քաղաքական գործչի կարծիքով, Հայաստանի խորհրդարանը պետք է հանդես գա հայտարարությամբ, որում հերթական անգամ կարձանագրվեն Հայաստանի նախագահ Սերժ Սարգսյանի ուղերձում պարունակվող դրույթները։
Այս տարվա հոկտեմբերի 10-ին նախագահ Սարգսյանն արձանագրությունների ստորագրման նախօրեին հանդես եկավ հայ ժողովրդին ուղղված ուղերձով, որի համաձայն, Թուրքիայի հետ ցանկացած հարաբերություններ չեն կարող կասկածի տակ դնել 1915 թվականի հայոց Ցեղասպանությունը և զրկել հայերին Հայրենիքից, Հայաստանի և Թուրքիայի միջև առկա է սահմանների հարց, ստորագրված արձանագրությունները որևէ կերպ չեն կարող վերաբերել ղարաբաղյան հակամարտության կարգավորման հարցին։
«Արձանագրությունները պետք է վավերացվեն Հայաստանի խորհրդարանի կողմից որոշակի վերապահումով, որի համաձայն հայ ժողովուրդը երբեք չի հրաժարվի իր պատմական հայրենիքի հատվածից, որը հակառակ միջազգային իրավունքի և մասնավորապես, տարածքային ամբողջականության սկզբունքի, զավթել է Թուրքիան 1918-1920 թթ. հայ-թուրքական պատերազմի ընթացքում»։
Ըստ նրա, Թուրքիան պետք է գիտակցի, որ «Հայաստանը երբեք չի նահանջի իր օրինական պահանջից՝ իր պատմական հայրենիքի ազատագրումից, եթե նույնիսկ ստորագրվեն տասնյակ նմանատիպ պայմանագրեր կամ փաստաթղթեր»։
Ընդհանուր առմամբ, Բաբուխանյանը նշեց, որ ՍԻՄ-ը կողմ է արտաքին քաղաքականության մեջ Հայաստանի նախագահի կողմից ձեռնարկվող քայլերին։ -0-
