Հայաստանի նախարարություններն իրենց խնամակալության տակ կվերցնեն Կալինինգրադի հայկական կենտրոնը
ԵՐԵՎԱՆ, 11 նոյեմբերի. /Նովոստի-Արմենիա/. Հայաստանի սփյուռքի և մշակույթի նախարարություններն իրենց խնամակալության տակ կվերցնեն չորեքշաբթի Կալինինգրադում բացված հոգևոր-մշակութային կենտրոնը՝ ապահովելով կենտրոնի գրադարանի համալրումը և մշակույթի գործիչների այցերը, Կալինինգրադում կենտրոնի բացման ընթացքում հայտարարեց Հայաստանի նախագահ Սերժ Սարգսյանը։
«Ես հանձնարարել եմ սփյուռքի և մշակույթի նախարարներին իրենց խնամակալության տակ վերցնել մշակութային կենտրոնը և ապահովել գրադարանի պարբերաբար համալրումը, զինումն ուսումնական նյութերով, ինչպես նաև պարբերաբար այստեղ ուղարկել արվեստի գործիչների համերգների, ցուցահանդեսների կազմակերպման նպատակով»,- ասել է Սարգսյանը, տեղեկացնում է ՌԻԱ Նովոստին։ Նա նշել է, որ ինքն էլ Կալինինգրադ է ժամանել ոչ դատարկ ձեռքով։
«Ես այս կենտրոն եմ բերել Հայաստանի վերջին երկու տարվա ընթացքում արվեստի մասին գրքերի և ալբոմների մի ողջ հավաքածու։ Բացի այդ, ձեզ բերել եմ գրական ստեղծագործություն՝ հայկական այբուբենի կրկնօրինակը»,- ավելացրեց հայ առաջնորդը։
Նրա կարծիքով, կրկնօրինակն այբուբենի այսօրվա և անցյալի հիշեցում կդառնա։
«Այն բազմադարյա ուղի է անցել՝ 16 դար, որպեսզի մեզ հասցնի հայերեն լեզվով գրված առաջին նախադասություն դարձած աստվածաշնչյան ճշմարտությունը՝ «Ճանաչել զիմաստություն և զխրատ, իմանալ զբանս հանճարոյ»»,- ասաց նա։
«Հուսով եմ, որ ծնողներն այստեղ պարբերաբար կբերեն իրենց երեխաներին։ Այս կենտրոնը պետք է գործող կենտրոն դառնա Կալինինգրադի մարզի ողջ հայ բնակչության և բոլոր նրանց համար, ում հետաքրքրում է հայկական մշակույթը»,- նշել է Սարգսյանը։
Կալինինգրադի մարզում բնակվում է մոտ 15 հազար հայ (մարզային կառավարության տվյալներով, 1989 թվականին նրանց թիվը 1,6 հազար է կազմել), ընդհանուր առմամբ տարածաշրջանի բնակչությունը գրեթե 1 միլիոն է կազմում։
Սարգսյանն առանձին շնորհակալություն է հայտնել նաև Կալինինգրադի մարզի նահանգապետ Գեորգի Բոոսին և Կալինինգրադում Հայաստանի պատվավոր հյուպատոս, «Լուկոյլ-ԿՄՆ» գլխավոր տնօրեն Յուրի Կաջոյանին կենտրոնի ստեղծման և բացման համար։ -0-
