Համաշխարհային ջազի լեգենդ Ջորջ Բենսոնը Երևանում հանդես կգա միակ համերգով

Համաշխարհային ջազի լեգենդ Ջորջ Բենսոնը Երևանում հանդես կգա միակ համերգով։

Ամերիաբանկի նոր գլխամասային գրասենյակի բացմանը նվիրված համերգը կանցկացվի Հայաստանի նախագահ Սերժ Սարգսյանի բարձր հովանու ներքո և Մշակույթի նախարարության աջակցությամբ, «21-ի հեռանկարներ» 10-րդ միջազգային երաժշտական փառատոնի շրջանակներում։

66-ամյա ամերիկացի երաժիշտ Ջորջ Բենսոնը ջազ-կիթառահարի իր կարիերան սկսել է 21 տարեկան հասակում։ Նա ավելի հայտնի է որպես փոփ և R&B երգիչ, ում ճանաչում են բերել այնպիսի երգեր, ինչպիսիք են՝ «Give Me the Night», «Lady Love Me (One More Time)», «Turn Your Love Around», «Inside Love(So Personal)», «In Your Eyes», «This Masquerade».

Ջորջ Բենսոնը, լինելով հանրահայտ կիթառահար ջազի ողջ պատմության ընթացքում, նվագելով սվինգից և փոփից մինչև ջազ-ռոք և  smooth-ջազ, երբեմն անցնելով ռիթմ-ն-բլյուզի և փոփ-երաժշտության, հայտնի է նաև որպես փոփ և ջազ մեներգիչ։

Միաժամանակ նրա կիթառը երբեք չի անցել երկրորդ պլան՝ հավասարություն պահպանելով վոկալ և գործիքային պիեսների միջև։ -0-