Հայաստանի և Շվեյցարիայի արտգործնախարարները երկկողմ համագործակցության համաձայնագիր են ստորագրել
ԵՐԵՎԱՆ, 11 նոյեմբերի. /Նովոստի-Արմենիա/. ՀՀ ԱԳ նախարարն Էդվարդ Նալբանդյանն ու Շվեյցարիայի արտաքին հարաբերությունների դաշնային դեպարտամենտի ղեկավար Միշլին Քալմի-Ռեյը ՀՀ ԱԳ նախարարի՝ Շվեյցարիա կատարած կարճատև պաշտոնական այցի շրջանակներում երկկողմ համագործակցության մասին մի շարք համաձայնագրեր են ստորագրել:
Ինչպես «Նովոստի-Արմենիա» գործակալությանը տեղեկացրեցին ՀՀ ԱԳՆ մամուլի ծառայությունից, ստորագրվել են «Հայաստանի Հանրապետության կառավարության և Շվեյցարիայի դաշնային խորհրդի միջև կանոնավոր օդային հաղորդակցությունների մասին համաձայնագիրը» և «Հայաստանի Հանրապետության կառավարության և Շվեյցարիայի դաշնային խորհրդի միջև դիվանագիտական անձնագրեր ունեցող անձանց համար մուտքի արտոնագրի պահանջը վերացնելու մասին համաձայնագիրը»:
Այցի շրջանակներում կողմերը նաև գոհունակությամբ նշել են, որ վերջին տարվա ընթացքում երկկողմ հարաբերություններն աննախադեպ զարգացում ապրեցին, ինչի վկայությունն է Հայաստանի և Շվեյցարիայի նախագահներ Սերժ Սարգսյանի և Հանս-Ռուդոլֆ Մերցի հանդիպումը, արտգործնախարարների միջև կայացած տասնյակ բանակցությունները և Շվեյցարիայի միջնորդությունը հայ-թուրքական հարաբերությունների կարգավորման գործընթացում:
Հարաբերությունների զարգացումը նշանավորվեց Շառլ Ազնավուրի՝ Շվեյցարիայում ՀՀ դեսպան նշանակմամբ, ինչպես նաև Հայաստանում Շվեյցարիայի դիվանագիտական ներկայացուցչության հիմնադրմամբ:
Անդրադառնալով հայ-թուրքական հարաբերությունների կարգավորման գործընթացին և Շվեյցարիայի միջնորդությանը` Էդվարդ Նալբանդյանը երախտագիտություն է հայտնել միջնորդական ջանքերի համար
Հայաստանի արտգործնախարարի բնորոշմամբ` Շվեյցարիան ստանձնել էր մի առաքելություն, որը պահանջում էր միաժամանակ հաստատակամություն և զսպվածություն, երևակայություն, զգուշություն ու համբերություն, և միջնորդ պետությունը պատվով կատարեց այդ առաքելությունը:
Էդվարդ Նալբանդյանն ու Միշլին Քալմի-Ռեյն անդրադարձել են նաև Հարավային Կովկասի տարածաշրջանային հարցերին և զարգացումներին:-0-
