Հայաստանն ու Չեխիան մտադիր են ընդլայնել երկկողմ իրավապայմանագրային բազան

ԵՐԵՎԱՆ, 10 նոյեմբերի. /Նովոստի-Արմենիա/. Հայաստանն ու Չեխիան մտադիր են ընդլայնել երկկողմ իրավապայմանագրային բազան, երեքշաբթի «Նովոստի-Արմենիա» գործակալությանը հայտնեցին հայկական ԱԳՆ մամուլի ծառայությունից:

Այս մասին հայտարարվել է ՀՀ ԱԳՆ-ում կայացած հայ-չեխական քաղաքական խորհրդակցությունների ժամանակ, որին մասնակցել է ՀՀ ԱԳ նախարարի տեղակալ Կարինե Ղազինյանը:

Խորհրդակցությունների ընթացքում քննարկվել են երկկողմ հայ-չեխական բիզնես-կապերի զարգացման աջակցմանը վերաբերող հարցեր, ինչպես նաև երկու երկրների համագործակցության հարցերը ԵՄ «Արևելյան գործընկերություն» նախաձեռնության շրջանակներում:

«Կողմերը քննարկեցին քաղաքական երկխոսությանը, առևտրային կապերի և ներդրումների խրախուսմանը, միջազգային կազմակերպություններում երկկողմ համագործակցությանը առնչվող հարցերի լայն շրջանակ»,- ասվում է հաղորդագրության մեջ:

Հաղորդագրության համաձայն՝ խորհրդակցության ընթացքում մտքեր են փոխանակվել տարածաշրջանային անվտանգության խնդիրների, ինչպես նաև Հայաստան-ԵՄ հարաբերությունների, «Արևելյան գործընկերության» շրջանակներում փոխգործակցության վերաբերյալ:

«Կողմերը նշեցին մարդկային շփումների խրախուսման կարևորությունն ինչպես երկկողմ, այնպես էլ բազմակողմ ձևաչափերում»,- ասվում է հաղորդագրության մեջ:

Կողմերը պայմանավորվեցին երկկողմ քաղաքական շփումներին հաղորդել պարբերական բնույթ: Չեխական կողմը հրավիրեց ՀՀ ԱԳՆ ներկայացուցիչներին խորհրդակցությունների հաջորդ փուլն անցկացնել Պրահայում:-0-