«Արևելյան գործընկերություն» ծրագիրը թույլ կտա Հայաստանին մերձենալ եվրոպական ընտանիքին

ԵՐԵՎԱՆ, 10 նոյեմբերի. /Նովոստի-Արմենիա/. «Արևելյան գործընկերություն» ծրագիրը թույլ կտա Հայաստանին մերձենալ եվրոպական ընտանիքի հետ, երեքշաբթի Միջազգային եվրոպական շարժում կազմակերպության գլխավոր քարտուղար Դիոգո Պինտոյի (Diogo Pinto) հետ հանդիպման ժամանակ ասաց ՀՀ ԱԳ նախարարի տեղակալ Կարինե Ղազինյանը:

«Ղազինյանն ընդգծեց, որ այդ ծրագիրը հնարավորություն է ընձեռում Հայաստանին ավելի մոտենալ եվրոպական ընտանիքին` միաժամանակ ընդգծելով, որ համագործակցության այդ նոր հարթակը չպետք է օգտագործվի հակամարտությունների քննարկման համար, այլ այն պետք է ամուր հիմք հանդիսանա հետագա համագործակցության ընդլայնման և ամրապնդման գործում»,- հայտնում է ԱԳՆ մամուլի ծառայությունը:

Զրուցակիցները մտքեր փոխանակեցին ԵՄ Արևելյան գործընկերության ծրագրի վերաբերյալ` նշելով, որ այն մեծ ներուժ է պարունակում ինչպես ներառված երկրների և ԵՄ միջև համագործակցության, այնպես էլ տարածաշրջանային բազմակողմ համագործակցության զարգացման համար:

Փոխնախարար Ղազինյանը բարձր է գնահատել Միջազգային եվրոպական շարժման ներդրումը եվրոպական արժեքների տարածման և միասնական Եվրոպայի ստեղծման գործում: 

Գլխավոր քարտուղար Պինտոն կարևորել է Հայաստանի հետևողականությունը եվրոպական կառույցներին ինտեգրման գործընթացում` ընդգծելով Հայաստանի Եվրոպական շարժման դերակատարությունը եվրոպական խնդիրների և արժեքների տարածման գործում:

Հանդիպմանը անդրադարձ կատարվեց հայ-թուրքական հարաբերությունների կարգավորման գործընթացին, ինչպես նաև մտքեր փոխանակեցին մի շարք տարածաշրջանային և միջազգային խնդիրների վերաբերյալ:-0-