Տնտեսական անկման մակարդակով Հայաստանն առաջատարի դիրքում է. ընդդիմություն

ԵՐԵՎԱՆ, 10 նոյեմբերի. /Նովոստի-Արմենիա/. Հայաստանը ռեկորդակիր է տնտեսական անկման մակարդակով մյուս երկրների համեմատ, երեքշաբթի լրագրողներին ասաց Հայ ազգային կոնգրեսի (ՀԱԿ) համակարգող Լևոն Զուրաբյանը։

«Նկատի առնելով, որ աշխարհում արձանագրված ՀՆԱ անկման ծավալը միջինը կազմել է 1,5 տոկոս, ՀՆԱ-ի անկման մակարդակը Հայաստանում 2009 թվականի 9 ամիսների ընթացքում կազմել է ավելի քան 18 տոկոս, և դա զարհուրելի ցուցանիշ է»,- ասաց նա։

Հայաստանի ազգային վիճակագրական ծառայության տվյալներով՝ երկրի տնտեսության անկումը 2009 թվականի հունվար-սեպտեմբերին կազմել է 18,3 տոկոս 2008 թվականի նույն ժամանակահատվածի համեմատ։

Զուրաբյանի կարծիքով՝ վերջին տարում նկատի առնելով տրանսֆերտների ծավալի կրճատումը 40-50 տոկոսով, կարելի է վստահ ասել, որ Հայաստանի տնտեսությունը կոլապսի առաջ է կանգնած։

Միաժամանակ ԱՎԾ պաշտոնական տվյալների համաձայն՝ 2009 թվականի հունվար-օգոստոս ամիսների ընթացքում Հայաստանի բանկային համակարգով ֆիզիկական անձանց անունով ստացվել են ոչ առևտրային բնույթի 672,3 մլն դոլարի միջոցներ։ Վիճակագրական տվյալների համաձայն՝ այս ցուցանիշը կրճատվել է 35 տոկոսով կամ 363 մլն-ով 2008 թվականի նույն ժամանակահատվածի համեմատ։ Մուտքերի մաքուր հոսքը հունվար-օգոստոսին կազմել է 557,6 մլն դոլար՝ նախորդ տարվա նույն ժամանակահատվածի 882,7 մլն-ի դիմաց։

Ընդդիմադիրի խոսքերով՝ փոխանցումները մնում էին Հայաստանի տնտեսությունը շարժող միակ տարրը։

Ինչպես կարծում է Զուրաբյանը, Հայաստանի նման տնտեսական իրավիճակի միակ բացատրությունը վերջին 11 տարիների ընթացքում հանրապետությունում ձևավորված արատավոր քաղաքական համակարգն է, որն, իշխանության գալով, ծառայում է մի քանի անձանց շահերին։

Այս իրավիճակից միակ ելքն, ինչպես կարծում է ՀԱԿ համակարգողը, առողջ, ազատ մրցակցության և նախաձեռնության ազատ դրսևորման վրա հիմնված ժողովրդավարական իշխանական համակարգի կառուցումն է։ -0-