Նկարիչ Վիլիկ Զաքարյանի աշխատանքների անհատական ցուցահանդեսն է բացվել Երևանում

Նկարիչ Վիլիկ Զաքարյանի աշխատանքների անհատական ցուցահանդեսն է բացվել նոյեմբերի 9-ին Երևանում՝ Հայաստանի Նկարիչների միության շենքում։ Ցուցահանդեսում ներկայացված են նկարչի՝ 2000-2009 թվականներին ստեղծած աշխատանքները։

«Իմ աշխատանքներում ես միշտ տեղ եմ թողնում այցելուի երևակայության համար, որը միանում է իմ մտահղացմանը և կտավի մասին ամբողջական պատկերացում է ստեղծում»,- ասաց նկարիչը։

Նկարչի խոսքերով՝ իր աշխատանքներն արված են մոդեռն ոճով։ Սակայն Զաքարյանն ավելացրեց, որ չի սահմանափակում իրեն որևէ գունային կամ ոճային սահմաններով։ «Թող քննադատները մտածեն, թե ինչպես կոչել իմ ստեղծագործությունը»,- ասաց Զաքարյանը։

Ինչպես ցուցահանդեսի բացմանը նշեց արվեստաբան Լևոն Լաճիկյանը, Զաքարյանին հաջողվել է ստեղծել իր սեփական ոճը։ «Սակայն, ի տարբերություն շատերի, նա դրանով չի սահմանափակվի։ Իր ստեղծագործությունում նա մշտապես  կատարելագործում է իր ոճը»,- նշեց քննադատը։

Վիլիկ Զաքարյանը ծնվել է 1952 թվականին։ 1975 թվականին ավարտել է Երևանի Գեղարվեստաթատերական ինստիտուտը։ 1984 թվականից Նկարիչների միության անդամ է, իսկ 1996-ից՝ ՅՈՒՆԵՍԿՕ-ի պրոֆեսիոնալ նկարիչների միության անդամ։

Զաքարյանի աշխատանքների անհատական ցուցահանդեսներն անցկացվել են Պրահայում (1988), Օբերհաուզենում (1995), Փարիզում (1997), Մոսկվայում (2002) և Մարսելում (2004)։ -0-