Թուրքիան Ղարաբաղյան հակամարտության միջնորդ չի լինի, երկուշաբթի լրագրողներին հայտարարեց ՀՀԿ-ից ԱԺ պատգամավոր Լեռնիկ Ալեքսանյանը:
«Ես բացառում եմ այն հնարավորությունը, թե Թուրքիան էական դեր կխաղա Ղարաբաղյան հիմնահարցի լուծման գործում ԵԱՀԿ ՄԽ շրջանակենրում»,- ասաց Ալեքսանյանը:
Նրա խոսքով՝ Թուրքիան, լինելով տարածաշրջանի երկրներից մեկը, չի կարող չմասնակցել տարածաշրջանային գործընթացներում, սակայն Ղարաբաղյան խնդրի լուծման գործին չի մասնակցի, գոնե՝ պաշտոնապես:
Միևնույն ժամանակ պատգամավորը հավելեց, որ «Թուրքիային այսօր հանդարտություն է պետք տարածաշրջանում»:
Ղարաբաղյան հակամարտությունը սկսվել է 1988 թվականին, երբ գերազանցապես հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին: 1991թ. դեկտեմբերի 10-ին Լեռնային Ղարաբաղում հանրաքվե անցկացվեց, որի ժամանակ մասնակիցների 99,89 տոկոսը քվեարկեց Ադրբեջանից լիովին անկախանալու օգտին:
Դրան հետևեցին Ադրբեջանի ձեռնարկած լայնածավալ ռազմական գործողությունները, որոնք հանգեցրին նրան, որ նրանք կորցրեցին վերահսկողությունը ոչ միայն Լեռնային Ղարաբաղի, այլև հարակից յոթ շրջանների նկատմամբ:
1994թ. մայիսի 12-ին զինադադարի վերաբերյալ եռակողմ համաձայնագրի կնքումից հետո հակամարտության գոտում դադարեցին ռազմական գործողությունները, որոնց արդյունքում երկու կողմից էլ եղավ շուրջ 25-30 հազար զոհ և մոտ մեկ միլիոն մարդ ստիպված լքեց բնօրրանը:
Հրադադարի ռեժիմ հաստատելու վերաբերյալ համաձայնագիրը մինչ այսօր ուժի մեջ է: 1992 թվականից ի վեր հակամարտության խաղաղ կարգավորման ուղղությամբ բանակցություններ են տարվում ԵԱՀԿ Մինսկի խմբի շրջանակներում, որի համանախագահներն են ԱՄՆ-ն, Ռուսաստանը և Ֆրանսիան:--0--
