ՀՀ նախագահը մեկնել է Հունգարիա և Կալինինգրադի մարզ

ՀՀ նախագահ Սերժ Սարգսյանը կիրակի եռօրյա պետական այցով մեկնել է Հունգարիա, հաղորդում է ՀՀ նախագահի մամուլի ծառայությունը:

Նախագահի գլխավորած պատվիրակության կազմում են արտգործնախարար Էդվարդ Նալբանդյանը, արդարադատության նախարար Գևորգ Դանիելյանը, սփյուռքի նախարար Հրանուշ Հակոբյանը, մշակույթի նախարար Հասմիկ Պողոսյանը, գյուղատնտեսության նախարար Գերասիմ Ալավերդյանը, ԱԺ-ի հայ-հունգարական բարեկամության խմբի ղեկավար, պատգամավոր Գագիկ Մելիքյանը:

Նոյեմբերի 9-ին Հունգարիայի Հանրապետության նախագահի նստավայրում տեղի կունենա ՀՀ նախագահի դիմավորման պաշտոնական արարողությունը, որին կհաջորդի նախագահներ Սերժ Սարգսյանի և Լասլո Շոլոմի առանձնազրույցը: Դրանից հետո նախագահների մասնակցությամբ տեղի կունենա պավիրակությունների ընդլայնված կազմով հանդիպումը:

Երկու երկրի կառավարությունների միջև կստորագրվեն համագործակցության մի շարք համաձայնագրեր: Այնուհետեւ նախագահները հանդես կգան մամուլի համար հայտարարությամբ:

Նույն օրը նախագահ Սարգսյանը հանդիպում կունենա նաև Հունգարիայի Խորհրդարանի նախագահ Բելա Կատոնայի հետ:

Բուդապեշտում Սերժ Սարգսյանը կայցելի Հերոսների հրապարակ, որտեղ ծաղկեպսակ կդնի հուշահամալիրում: Պետեֆի հրապարակում ՀՀ Նախագահը ծաղկեպսակ կդնի Մեծ Եղեռնի զոհերի հիշատակի խաչքարին:

Օրվա ավարտին Հունգարիայի նախագահ Լասլո Շոլոմի անունից ի պատիվ Հայաստանի նախագահ Սերժ Սարգսյանի կտրվի պետական ճաշ:

Նոյեմբերի 10-ին ՀՀ նախագահը կհանդիպի Կարդինալ Պետեր Էրդոյին և Հունգարիայի վարչապետ Գորդոն Բայնային, ապա և` հայ-հունգարական գործարար համաժողովի մասնակիցներին:

Սերժ Սարգսյանը կայցելի նաև Բուդապեշտի տեսարժան վայրեր: ՀՀ նախագահը Հունգարիայի նախագահի հետ շրջայց կկատարի Բուդապեշտի ռազմական պատմության թանգարանում:

Նոյեմբերի 10-ին ՀՀ նախագահը ՌԴ Կալինինգրադի մարզի նահանգապետ Գեորգի Բոոսի հրավերով Բուդապեշտից կարճատև աշխատանքային այցով կմեկնի Կալինինգրադ:

Նախագահ Սարգսյանը կհանդիպի նահանգապետին, ապա նաև` տեղի հայ համայնքի ներկայացուցիչներին:

Կալինինգրադում Նախագահ Սարգսյանը ներկա կգտնվի հայկական մշակութային կենտրոնի բացման հանդիսավոր արարողությանը, ծաղիկներ կդնի հայկական խաչքար-հուշակոթողին:

Նոյեմբերի 11-ին ՀՀ Նախագահը կվերադառնա Երևան:-0-