ԵՐԵՎԱՆ, 6 նոյեմբերի. /Նովոստի-Արմենիա/. Թուրքիան 2010 թվականին կմասնակցի CTS զբոսաշրջային ցուցահանդեսին Երևանում, ուրբաթ CTS 2009 ամենամյա միջազգային զբոսաշրջային ցուցահանդեսի բացմանը հայտարարեց Հայաստանի տուրիստական գործակալությունների միության նախագահի տեղակալ Եղիշե Թանաշյանը։
«Հայաստանի տուրիստական գործակալությունների միության և Թուրքիայի նմանատիպ միության և թուրքական առևտրաարդյունաբերական պալատի ներկայացուցիչների հետ հանդիպումների արդյունքում պայմանավորվածություն է ձեռք բերվել CTS 2010 ցուցահանդեսին Թուրքիայի մասնակցության վերաբերյալ»,- ասաց Թանաշյանը։
Նրա խոսքերով, թուրքական կողմն ափսոսանք է հայտնել այս տարի ցուցահանդեսին չմասնակցելու առիթով, սակայն հաստատել է իր մասնակցությունը հաջորդ՝ 2010 թվականի հոբելյանական՝ թվով 10-րդ ցուցահանդեսին։
Թանաշյանը նշեց, որ ցուցահանդեսն ուղղված է Հայաստանի ոչ միայն ներգնա, այն նաև արտագնա զբոսաշրջության խթանմանը։
Ինչպես նշեց Թանաշյանը, հաջորդ տարի ցուցահանդեսը կկազմակերպվի գարնանը, և ոչ թե աշնանը, ինչը թույլ կտա խթանել զբոսաշրջիկների հոսքն ամառային արձակուրդների սեզոնում։
«Չնայած ճգնաժամի հասցրած վնասին՝ Հայաստանի տուրիստական գործակալությունների միությունն ուրախ է փաստել, որ դա որևէ կերպ չի արտացոլվել ցուցահանդեսի մասնակիցների թվի վրա, և, ավելին, ակնհայտ է ցուցահանդեսի աշխարհագրության ընդլայնումը»,- ասաց Թանաշյանը։ 2009 թվականին ցուցահանդեսին մասնակցում է ավելի քան 65 ընկերություն, հյուրանոցային համալիր, ավիաընկերություն, ասոցիացիա, որոնց թվում են ոչ միայն հայրենական, այլ նաև օտարերկրյա ընկերություններ, մասնավորապես, շուրջ ինը ընկերություն Վրաստանից, ինչպես նաև Իսրայելից, Հունաստանից և Լեռնային Ղարաբաղից։
Ցուցահանդեսը կազմակերպվել է Հայաստանի էկոնոմիկայի նախարարության հովանու ներքո և ASTA-ի (ASTA-American Society of Travel Agents) մասնակցությամբ։ Հիմնական գործընկերներն են՝ USAID CAPS-ը (Հայաստանի մրցունակ մասնավոր հատված), Հայաստանի տուրիստական գործակալությունների միությունը։ Ցուցահանդեսն առաջին անգամ անցկացվել է 1999 թվականին։ -0-
