Orange Armenia-ն մտադիր է ամենասիրելի ապրանքանիշը դառնալ Հայաստանում, հինգշաբթի Երևանում հայտարարեց ֆրանսիական «Orange» ընկերության Եվրոպայի գծով փոխնախագահ Օլաֆ Սուանտին ընկերության՝ հայկական շուկա դուրս գալու հետ կապված մամուլի ասուլիսի ժամանակ:
Այսօրվանից Orange Armenia օպերատորն անցնում է հայկական շուկայում բջջային կապի և ինտերնետ ծառայությունների տրամադրմանը։ France Telecom-ի 100 տոկոսանոց դուստր Orange Armenia-ն 5 տարի ժամկետով և երկարաձգման ևս 15 տարի ժամկետով վերջնական լիցենզիա ստացավ 2008 թվականի նոյեմբերի 19-ին։
Սուանտիի խոսքով` դրա համար ընկերությունն արդեն Հայաստանում շուրջ 100 մլն եվրոյի ներդրումներ է արել՝ ապահովելով ողջ ենթակառուցվածքի շինարարությունը, և մտադիր է շարունակել ներդրումները մոտակա 2-3 տարում՝ ապահովելով որակյալ և ժամանակակից ցանց:
Ընկերությունը շեշտը դնելու է, մասնավորապես, բջջային և Ինտերնետ-ծառայությունների զարգացման, նորարարական ծառայությունների պորտֆելի ներմուծման, գերարագ ինտերնետի մատչելիության վրա:
«Հայաստանը 31-րդ երկիրն է, որտեղ կներկայացվի Orange ապրանքանիշը: Մենք ուժեղ ցանց ենք ստեղծել, հրաշալի գնային առաջարկներ, և կարծում ենք, որ դա աճի նոր ալիք կլինի շուկայի և ընկերության համար»,- ասաց Սուանտին:
Նրա խոսքով` չնայած այսօր բջջային կապը գրավում է հայկական շուկայի 80 տոկոսը, Orange-ը լուրջ հնարավորություններ է տեսնում հաջող գործունեություն ծավալելու համար:
«Մեր հավակնությունները հայկական շուկայում այն կերպարանափոխելն ու Հայաստանի ամենասիրելի ապրանքանիշը դառնալն է: Մենք վստահ ենք, որ ցանցը ստեղծած թիմը, կկարողանա կատարել իր առաջ դրված նպատակները»,- ասաց Սուանտին:
Իր հերթին Orange (Ֆրանսիա) ընկերության գլխավոր տնօրեն և նախագահ Դիդիե Լամբարը նշեց, որ ընկերությունը հայկական շուկայում տարբերվելու է նորարարություններով ու տեխնոլոգիաներով:
«Մենք մտադիր ենք հայկական շուկայում օգտագործել ընկերության բոլոր նորարարություններն ու տեխնիկական հանրավորությունները, որոնք մշակվում են Orange-ի 18 լաբորատորիաներում ամբողջ աշխարհում»,- ասաց Լամբարը:
Orange Armenia-ն Հայաստանում աշխատանքը կսկսի 83 տոկոս ծածկույթով, ապահովելով ջջային ցանցի և ինտերնետի հասանելիություն հանրապետության 500 քաղաքներում և գյուղերում: Ընկերությունը ծառայություններ է տրամադրում 2,5G и 3G, ինչպես նաև 3G+ ցանցի տեխնոլոգիաների հիման վրա: Ընկերության ռոումինգը մատչելի է աշխարհի 130 երկրներում: -0-
