Հայաստանի վարչապետ Տիգրան Սարգսյանը Լոս Անջելեսում հանդիպել է «Լինսի» հիմնադրամի նախագահ Ջեյ Ռաքոուին և առաջին փոխնախագահ Հարութ Սասունյանին, հայտնում է կառավարության մամուլի ծառայությունը:
Հաղորդագրության համաձայն՝ զրուցակիցները քննարկել են Հայաստանի Հանրապետության և հիմնադրամի միջև համագործակցության հարցերը:
Լինսի հիմնադրամը ֆինանսավորվում է հայկական ծագմամբ ամերիկյան գործարար, միլիարդեր Քըրք Քըրքորյանի կողմից։ «Լինսի» հիմնադրամի առաջին ծրագիրը 2001-2003թթ. կազմել է 150 մլն. ԱՄՆ դոլար։
Հիմնադրամի 2006-2008թթ ծրագրով, որն արժե 60 մլն ԱՄՆ դոլար, իրականացվել է երեք նախագիծ. ճանապարհաշինություն՝ 20 մլն., Երևանի փողոցների վերականգնում՝ 20 մլն., և դպրոցների բարեկարգում (նույն արժողությամբ)։
Հայկական կառավարության ղեկավարի գլխավորած պատվիրակությունը աշխատանքային այցով գտնվում է ԱՄՆ «Սիլիկոնային հովտի» կենտրոն Սան Խոսե քաղաքում կայանալիք «Արմթեք 2009» գործարար համաժողովին մասնակցելու նպատակով:
Հայաստանի Հանրապետության պատվիրակությունը գլխավորում է վարչապետ Տիգրան Սարգսյանը: Պատվիրակության կազմում են ՀՀ կառավարության աշխատակազմի ղեկավար Դավիթ Սարգսյանը, էկոնոմիկայի նախարար Ներսես Երիցյանը, պաշտոնատար այլ անձինք:
Հայաստանի բարձր տեխնոլոգիաների ոլորտի երրորդ գլոբալ միջազգային Armtech (Armenian Technology Congress) համաժողովը տեղի կունենա 2009թ. նոյեմբերի 5-8-ը ԱՄՆ Կալիֆոռնիա նահանգի Սան Խոսե քաղաքում: Պայմանավորվածության համաձայն՝ ArmTech-ն անցկացվում է հերթափոխով՝ Կալիֆոռնիայի Սիլիկոնային հովտում և Հայաստանում:
ArmTech առաջին կոնգրեսն անցկացվել է 2007 թ.-ի հուլիսի 4-7-ը Սան Ֆրանցիսկոյում։ Կոնգրեսին մասնակցել է աշխարհի շատ երկրների ավելի քան 350 ներկայացուցիչ։ Հայաստանը ներկայացրել են 60 գործարարներ և 11 գործարար ու կրթական կազմակերպություններ։
«ArmTech Congress-08» բարձր տեխնոլոգիաների երկրորդ կոնգրեսն անցկացվեց Երևանում 2008թ. հոկտեմբերի 4-5-ին: Կոնգրեսին մասնակցել է ԱՄՆ-ի, Ռուսաստանի, Ֆրանսիայի, եվրոպական այլ երկրների բազմաթիվ ընկերությունների 250 ներկայացուցիչ։-0-
