ՀՀ ԳԱԱ նախագահը դեմ է Թուրքիայի հետ Ցեղասպանության հարցը պատմական հարթության մեջ դիտարկելուն
ԵՐԵՎԱՆ, 4 նոյեմբերի. /Նովոստի-Արմենիա/. ՀՀ ԳԱԱ նախագահ Ռադիկ Մարտիրոսյանը դեմ է Թուրքիայի հետ Ցեղասպանության հարցը պատմական հարթության մեջ դիտարկելուն:
Հայաստանի ու Թուրքիայի արտգործնախարարներ Էդվարդ Նալբանդյանն ու Ահմեդ Դավութօղլուն հոկտեմբերի 10-ին Ցյուրիխի համալսարանում ստորագրեցին «Դիվանագիտական հարաբերությունների հաստատման մասին արձանագրությունը» և «Երկկողմ հարաբերությունների զարգացման մասին արձանագրությունը»:
Ինչպես չորեքշաբթի Մարտիրոսյանը Մամուլի ազգային ակումբում հայտնեց լրագրողներին, արձանագրություններով նախատեսվում է միջկառավարական հանձնաժողովի ստեղծում, որում ընդգրկված կլինեն երկկողմ հարաբերությունների տարբեր ոլորտների 10-12 ենթահանձնաժողովներ, որը հասարակության շրջանում ընկալվեց որպես պատմաբանների հանձնաժողով:
«Երկրների միջև տարբեր հարցերի քննարկման համար երկկողմ հանձնաժողովի ստեղծումը դրական եմ համարում, սա թույլ կտա մերձեցնել ժողովուրդներին, սակայն կարծում եմ, որ հայկական կողմը կտրականապես չպետք է Օսմանյան կայսրությունում հայոց Ցեղասպանության հետ կապված պատմական փաստերի քննարկման մեջ մտնի»,- ասաց ԳԱԱ նախագահը:
Նրա խոսքով, Ցեղասպանության թեման ամենակարևոր ու առանցքային հարցերից է Հայաստանի և Թուրքիայի միջև առկա մյուս արդիական խնդիրների ֆոնին:
«Սակայն հայկական կողմի համար տվյալ փաստը պատմականորեն ապացուցված է և հաստատման կարիք չունի, ինչի կապակցությամբ մենք չպետք է մասնակցենք թուրք գործընկերների հետ դրա քննարկումներին»,- ասաց Մարտիրոսյանը:
Հայ-թուրքական սահմանը փակ է 1993 թ.-ից՝ պաշտոնական Անկարայի նախաձեռնությամբ: Երկու երկրների միջև բարդ հարաբերությունները պայմանավորված են մի շարք հանգամանքներով, որոնք կապված են, մասնավորապես, Անկարայի՝ ադրբեջանական դիրքորոշման պաշտպանությամբ ղարաբաղյան հարցում, ինչպես նաև Թուրքիայի սուր արձագանքի հետ 1915 թվականին Օսմանյան կայսրությունում Հայոց ցեղասպանության միջազգային ճանաչման հետ:
Հայոց Ցեղասպանությունը ХХ դարի առաջին ցեղասպանությունն է։ Թուրքիան ավանդաբար մերժում է Առաջին համաշխարհային պատերազմի տարիներին մոտ մեկուկես միլիոն հայերի զանգվածային ջարդեր իրականացնելու մեղադրանքները և չափազանց ցավագին է վերաբերվում Հայոց Ցեղասպանության հարցի վերաբերյալ Արևմուտքի կողմից արվող քննադատություններին։-0-
