Վանկուվերի Ձմեռային օլիմպիադային Հայաստանը կներկայացնեն դահուկորդները, հայ գեղասահորդները խաղերին չեն մասնակցի

Հայաստանը Վանկուվերում կայանալիք Ձմեռային օլիմպիադային հիմնականում կներկայացնեն դահուկորդները, հայ գեղասահորդները խաղերին չեն մասնակցի, տեղեկացրեց ՀՀ սպորտի և երիտասարդության հարցերի նախարար Արմեն Գրիգորյանը:

«Հայաստանի համար Ձմեռային օլիմպիադային մասնակցելը կարևոր հարց է՝ հաշվի առնելով, հիմնականում, այն, որ մենք հարավային երկիր ենք: Սակայն արդեն երկար տարիներ մեր հավաքականը մասնակցում է Ձմեռային օլիմպիադաներին և մշտապես բարելավում է իր արդյունքները», - ասաց Գրիգորյանը:

Նրա խոսքերով՝ Վանկուվերում Հայաստանը պետք է ներկայացնի երկու լեռնադահուկորդ և մեկ դահուկորդ:

Նախարարը նաև տեղեկացրեց, որ գեղասահորդների հայկական զույգը վնասվածքի պատճառով չի կարող մասնակցել օլիմպիական խաղերին, և քանի որ Հայաստանը չի հասցրել նոր զույգ պատրաստել Վանկուվերի օլիմպիադայի համար, ապա այս մարզաձևում հայ մարզիկները հանդես չեն գա:

ՀՀ սպորտի և  երիտասարդության հարցերի նախարարը նշեց նաև, որ սովորաբար հայկական հավաքականը Ձմեռային օլիմպիադաներին մասնակցում է հինգ-վեց հոգանոց կազմով:

Ավելի վաղ ՀՀ սպորտի և երիտասարդության հարցերի նախարարության մամուլի ծառայությունը տեղեկացնում էր, որ Հայաստանը Վանկուվերում կայանալիք 2010 թ.-ի Ձմեռային օլիմպիադային մասնակցելու է երեք մարզաձևում՝ դահուկային սպորտ, լեռնադահուկային սպորտ, սկելեթոն:-0-