ՀՀ մշակույթի նախարարությունը փորձում է օպերատիվ արձագանքել Ադրբեջանի հակահայկական քարոզչությանը. փոխնախարար

ԵՐԵՎԱՆ, 3 նոյեմբերի. /Նովոստի-Արմենիա/. ՀՀ մշակույթի նախարարությունը փորձում է օպերատիվ արձագանքել հարևան Ադրբեջանի կողմից անցկացվող հակահայկական քարոզչությանը, երեքշաբթի ասաց երկրի մշակույթի փոխնախարար Արթուր Պողոսյանը։  

«ՀՀ նախագահի հանձնարարությամբ մշակույթի, սփյուռքի և արտաքին գործերի նախարարությունները պետք է գործողությունների ծրագիր և համագործակցության ձևաչափ մշակեն հայապահպանության և հակահայկական քարոզչության դեմ պայքարելու համար»,- նշեց Պողոսյանը։

Մշակույթի փոխնախարարն ասաց, որ նախարարությունը հնարավորությունների սահմաններում փորձում է արձագանքել հակահայկական քարոզչությանը։ Որպես նմանատիպ գործունեության օրինակ՝ Պողոսյանը բերեց մշակույթի նախարարության վերջին հայտարարությունը Թուրքիայի տարածքում գտնվող մշակույթի հայկական կոթողները որպես վրացական հուշարձաններ ներկայացնելու փորձի առնչությամբ։

Փոխնախարարը նշեց, որ նախարարության քաղաքականությունը հիմնված է հայկական մշակութային ժառանգության պաշտպանության ծրագրերի վրա, որոնք զգալիորեն ընդլայնվել են ՀՀ խորհրդարանի կողմից «Ոչ նյութական մշակութային ժառանգության մասին» օրենքի ընդունումից հետո։

Պողոսյանը նշեց, որ ներկայումս նախարարությունն ակտիվ պատրաստում է հայկական նյութական մշակութային ժառանգության ցուցակը ՅՈՒՆԵՍԿՕ-ի համար, իսկ վերջերս հայկական մշակույթի ներկայացման ծրագրով Աբու Դաբիում որպես ոչ նյութական մշակութային ժառանգություն ներկայացվել է հայկական խաչքարը։ -0-