ՀՀ գիտության և կրթության նախարար Արմեն Աշոտյանը Եվրոպա-Հայաստան խորհրդատվական կոմիտեի անդամ, Լյուվենի կաթոլիկ համալսարանի ռեկտոր, պրոֆեսոր Բեռնար Կուլին հայանպաստ գործունեության համար պարգևատրեց ՀՀ կրթության և գիտության նախարարության բարձրագույն պարգևով` «Ոսկե հուշամեդալով», «Նովոստի-Արմենիա» գործակալությանը հայտնեցին կրթության նախարարության մամուլի ծառայությունից:
Կուլին, լինելով «Հայաստանի եվրոպական բարեկամներ» ընկերության անդամ, հայագիտական թեմաներով չորս աշխատության հեղինակ է. ևս մեկ հոդված նախատեսվում է լույս ընծայել այս տարվա ավարտին:
Մեծ է նաև նրա ավանդը հայկական սեպագրերի ուսումնասիրության գործում:
Նախարարը, հանձնելով հուշամեդալը, շնորհակալություն հայտնեց ռեկտորին` վերջինիս հայանպաստ գործունեության և հայագիտության ոլորտում իրականացրած ուսումնասիրությունների համար:
«Ես հուսով եմ, որ Հայաստանի, մասնավորապես, հայ մշակույթի և գիտության հանդեպ Ձեր հետաքրքրությունը շարունակական կլինի, և Ձեր գործունեության շնորհիվ նաև ՀՀ կրթական ոլորտն ավելի դյուրին և արագ կինտեգրվի եվրոպական կրթական տարածքին` դառնալով համակարգի լիիրավ մասը»,- ասաց Աշոտյանը:
Բեռնար Կուլին իր երախտագիտությունը հայտնեց հուշամեդալի կապակցությամբ` նշելով, որ խորապես զգացված է նման բարձրագույն պարգևի արժանանալու համար և հավաստիացրեց, որ կշարունակի նպաստել արտերկրում հայ մշակույթի տարածման կարևորագույն գործին:
Հանդիպման ավարտին մասնակիցները քննարկեցին հաջորդ տարի նախատեսվող Հայաստանի Հանրապետության և Բելգիայի կառավարությունների միջև կրթության և գիտության ոլորտում համագործակցության վերաբերյալ համաձայնագրի ստորագրման և ՀՀ կրթության և գիտության նախարարության պատվիրակության` Բելգիայի Թագավորություն նախատեսվող պաշտոնական այցի հետ կապված հարցերը:-0-
