Ողջ միջազգային հանրությունը սպասում է հայ-թուրքական արձանագրությունների արագ վավերացմանն ու իրականացմանը. Նալբանդյան

ԵՐԵՎԱՆ, 2 նոյեմբերի. /Նովոստի-Արմենիա/. Ողջ միջազգային հանրությունը սպասում է հայ-թուրքական արձանագրությունների արագ վավերացմանն ու իրականացմանը, Ռոյթեր գործակալությանը տված հարցազրույցի ժամանակ ասել է ՀՀ արտգործնախարար Էդվարդ Նալբանդյանը:

«Ինչի՞ համար ենք մենք ստորագրել երկու արձանագրությունները, եթե չենք պատրաստվում դրանք վավերացնել ու իրականացնել: Կարծում եմ, որ ողջ միջազգային հանրությունը սպասում է այդ արձանագրությունների արագ վավերացմանն ու իրականացմանը, ինչպես նաև արձանագրություններում առկա պայմանավորվածությունների հանդեպ հարգանքին»,- նշեց Նալբանդյանը:  

Ընդ որում նա ասաց, որ Երևանն անընդունելի է համարում Թուրքիայի հետ հարաբերությունների ջերմացումը Ղարաբաղյան հակամարտության խնդրի հետ կապելը:  

«Նախապայմանների մասին խոսակցությունը նոր խոչընդոտներ և արհեստական բարդություններ ստեղծել է: Չեմ կարծում, որ դա ճիշտ ճանապարհ է կամ խոհեմ մոտեցում այս երկու արձանագրությունների վավերացման ու իրականացման հանդեպ»,- ասաց Նալբանդյանը:

«Եթե կողմերից մեկը վավերացման և իրականացման ճանապարհին խոչընդոտներ ստեղծի կամ ձգձգի գործընթացը, ապա, կարծում եմ, նա կկրի բացասական հետևանքների ողջ պատասխանատվությունը»,- հավելեց նա:

Նալբանդյանի խոսքերով՝ հայկական կողմը չի կարող որոշակի ժամանակ սահմանել, երբ այդ արձանագրությունները կվավերացվեն, «բայց մենք կարող ենք ուղղակի ասել, որ կանենք ամեն հնարավոր բան դրանց արագ վավերացման համար»:

ՀՀ ԱԳՆ ղեկավարն ընդունեց, որ երկու երկրների միջև հարաբերությունների հաստատումը ինչպես բանակցությունների երկար ու ձիգ ռաունդներից, այնպես էլ «ֆուտբոլային» դիվանագիտությունից հետո, երբ Թուրքիայի և Հայաստանի նախագահները ներկա են եղել երկու թիմերի ֆուտբոլային հանդիպումներին, հեշտ չի լինի:  

«Բանակցությունների փուլերից ոչ մեկը հեշտ չի եղել: Յուրաքանչյուր փուլը նախորդից ավելի բարդ է եղել, սակայն մենք ամեն դեպքում հասանք պայմանավորվածությունների և կնքեցինք արձանագրություններ, քանի որ դրա համար կար քաղաքական կամք»,- ասաց Նալբանդյանը: -0-