ԵՄ-ն 2009-2011 թթ.-ին Հայաստանին 16 միլիոն եվրո կտրամադրի դատաիրավական բարեփոխումների անցկացման համար. արդարադատության նախարարություն

ԵՐԵՎԱՆ, 2 նոյեմբերի. /Նովոստի-Արմենիա/. ԵՄ-ն մտադիր է Հայաստանին 16 մլն եվրո տրամադրել 2009-2011 թվականներին դատաիրավական բարեփոխումների անցկացման նպատակով, երկուշաբթի հայտնեց Հայաստանի արդարադատության նախարար Գևորգ Դանիելյանը պետաիրավական և ֆինանսավարկային բյուջետային հարցերի մշտական խորհրդարանական հանձնաժողովներում 2010թ. պետբյուջեի քննարկումների ժամանակ։

«2009 թվականին Հայաստանին կտրամադրվի 8 մլն եվրո, իսկ 2010-2011 թվականներին կփոխանցվի 4-ական մլն եվրո»,- տեղեկացրեց Դանիելյանը։

Ինչպես հայտնեց Հայաստանի արդարադատության նախարարը, միջոցների մի մասը կուղղվի նոր քրեակատարողական հաստատությունների վերականգնմանն ու կառուցմանը։

Դանիելյանի խոսքերով՝ շինարարական աշխատանքների հատկացումների չափերը կսահմանվեն անհրաժեշտ բոլոր նախագծային աշխատանքների և հստակեցումների անցկացումից հետո։

Հայաստանի արդարադատության նախարարը տեղեկացրեց, որ ներկայումս Գորիսի քրեակատարողական հիմնարկի նոր շենքի կառուցման նախապատրաստական աշխատանքներ են տարվում։ Հիմնարկը գտնվելու է Գորիսից Խնձորեսկ տանող ճանապարհին՝ Գորիսից 8 կմ հեռավորության վրա։

Միաժամանակ, Դանիելյանի խոսքերով, կշարունակվեն Արմավիրի քրեակատարողական հիմնարկի վերականգնողական աշխատանքները։

Ընդհանուր առմամբ Հայաստանի արդարադատության նախարարության կարիքներին պետբյուջեի կողմից կտարմադրվի 537,7 մլն դրամ։ Համաձայն 2010 թվականի Հայաստանի պետբյուջեի նախագծի՝ նախատեսված են 676,6 մլրդ դրամի պետբյուջեի եկամուտներ, իսկ ծախսերը՝ 859,6 մլրդ դրամի մակարդակով։

Հարկային մուտքերը Հայաստանի պետբյուջե 2010 թվականին նախատեսված են 533 մլրդ դրամի չափով։

Դոլարի հաշվարկային փոխարժեքը դրամի նկատմամբ նախատեսված է 376 դրամի մակարդակով մեկ դոլարի դիմաց։ -0-