ԵՐԵՎԱՆ, 30 հոկտեմբերի. /Նովոստի-Արմենիա/. ՀՀ պետբյուջեի ծախսերը 2010 թ.-ին բնակչության սոցիալական պաշտպանության ոլորտի համար ծրագրված են 239,8 մլրդ դրամի չափով, հայտնել է ՀՀ ֆինանսների նախարար Տիգրան Դավթյանը ուրբաթ երկրի խորհրդարանում բյուջետային լսումների ժամանակ:
Դավթյանը հայտնել է, որ հաջորդ տարվա սոցիալական ծախսերը երկրի պետբյուջեի ընդհանուր չափի 30 տոկոսն են կազմում՝ հավելելով, որ «ծրագրված հարաբերակցությունը բավականին մեծ ցուցանիշ է»:
Ֆինանսների նախարարության ղեկավարը տեղեկացրել է, որ պետբյուջեի ծախսերը 2010 թ.-ին կրթության ոլորտի համար 95 մլրդ դրամ կկազմեն, ինչը փոքր-ինչ քիչ է ընթացիկ տարում ծրագրված ցուցանիշից:
Սակայն նախարարը, չհստակեցնելով կրճատման չափը, հավելել է, որ ցուցանիշի իջեցումը կապված է կապիտալ ծախսերի կրճատման հետ:
2010 թ.-ի ծրագրով գիտության համար ծախսերը անփոփոխ են մնում և կկազմեն 8,4 մլրդ դրամ, իսկ առողջապահության ծախսերը 54,1 մլրդ դրամի կհասնեն:
«2010 թ.-ին կշարունակվի նաև 1988 թ.-ին երկրաշարժի արդյունքում տուժած աղետի գոտու վերականգնումը, և այդ նպատակներով կծախսվի 24 մլրդ դրամ»,- նշեց նա:
Ինչ վերաբերում է ԼՂՀ-ին օգնությանը, ապա, ինչպես նշեց նախարարը, այն մյուս տարի 31 մլրդ դրամ կկազմի:
«Օգնությունը կցուցաբերվի միևնույն ծավալով, ինչ որ այս տարի: Այստեղ մեր քաղաքականությունը չի փոխվել ու չի փոխվի»,- ընդգծեց նախարարը: -0-
