Հայաստանը կորցրել է վերահսկողությունը հայ-թուրքական հարաբերությունների գործընթացի նկատմամբ արձանագրությունների ստորագրումից հետո

ԵՐԵՎԱՆ, 30 հոկտեմբերի. /Նովոստի-Արմենիա/. Հայաստանը կորցրել է վերահսկողությունը հայ-թուրքական հարաբերությունների գործընթացի նկատմամբ արձանագրությունների ստորագրումից հետո, կարծում է Հայաստանի առաջին նախագահ, ՀԱԿ առաջնորդ Լևոն Տեր-Պետրոսյանի մամուլի քարտուղար Արման Մուսինյանը։

«Հայաստանը կորցրել է վերահսկողությունը գործընթացի նկատմամբ և այժմ նվազագույն հնարավորություններ ունի իրադարձությունների զարգացման վրա ազդելու համար, եթե չասենք, որ ընդհանրապես չի ազդում»,- ասաց նա լրագրողներին՝ հավելելով, որ ցյուրիխյան արձանագրությունները դարձան հայկական դիվանագիտության բացարձակ ձախողումը։

Հայաստանի ու Թուրքիայի արտգործնախարարներ Էդվարդ Նալբանդյանն ու Ահմեդ Դավութօղլուն հոկտեմբերի 10-ին Ցյուրիխի համալսարանում ստորագրեցին «Դիվանագիտական հարաբերությունների հաստատման մասին արձանագրությունը» և «Երկկողմ հարաբերությունների զարգացման մասին արձանագրությունը»:

Մուսինյանի խոսքերով՝ այդ արձանագրությունների ստորագրման հետևանքը կդառնա ղարաբաղյան խնդրի շուրջ գործընթացների ակտիվացումը, ինչը «որևէ լավ բան չի կանխագուշակում Հայաստանի համար»։

Նա ավելացրեց նաև, որ իշխանությունները ցանկանում էին Հայոց ցեղասպանության միջազգային ճանաչման գործընթացից հրաժարվելու հաշվին բաց սահման ստանալ Թուրքիայի հետ, սակայն սխալվեցին։

Հայաստանի և Թուրքիայի միջև չկան դիվանագիտական հարաբերություններ, իսկ 1993-ից, պաշտոնական Անկարայի նախաձեռնությամբ, փակ է հայ-թուրքական սահմանը։ -0—