ԵՐԵՎԱՆ, 30 հոկտեմբերի. /Նովոստի-Արմենիա/. Հայաստանի արտաքին գործերի նախարար Էդվարդ Նալբանդյանը գլխավոր է համարում հայ-թուրքական արձանագրությունները և ոչ թե դրանց վերաբերյալ արված մեկնաբանությունները:
«Իմ գործընկերներից մեկը Ցյուրիխում արձանագրությունների ստորագրման ժամանակ ասաց, որ գլխավոր հայտարարությունը ստորագրված արձանագրություններում է։ Մյուս բոլոր հայտարարություններն ու մեկնաբանությունները երկրորդական բնույթ են կրում։ Ես լիովին կիսում եմ այդ կարծիքը»,- ուրբաթ Երևանում իր բելառուս գործընկեր Սերգեյ Մարտինովի հետ կայացած համատեղ մամուլի ասուլիսի ընթացքում ասաց Նալբանդյանը։
Նալբանդյանը հերթական անգամ ընդգծեց, որ բոլոր ձեռքբերված պայմանավորվածությունները չեն պարունակում որևէ նախապայման։
Հայաստանի ու Թուրքիայի արտգործնախարարներ Էդվարդ Նալբանդյանն ու Ահմեդ Դավութօղլուն հոկտեմբերի 10-ին Ցյուրիխի համալսարանում ստորագրեցին «Դիվանագիտական հարաբերությունների հաստատման մասին արձանագրությունը» և «Երկկողմ հարաբերությունների զարգացման մասին արձանագրությունը»:
Հայաստանի և Թուրքիայի միջև չկան դիվանագիտական հարաբերություններ, իսկ 1993-ից, պաշտոնական Անկարայի նախաձեռնությամբ, փակ է հայ-թուրքական սահմանը։ -0-
