ԱՊՀ և Բալթյան երկրների երիտասարդ կինեմատոգրաֆիստների Երկրորդ Միջազգային կինոդպրոցի հանդիսավոր բացումը կկայանա կիրակի՝ նոյեմբերի 1-ին, ՌԴ Պետական ֆիլմադարանում, «Նովոստի-Արմենիա» գործակալությանը տեղեկացրեց ԱՊՀ հումանիտար համագործակցության միջպետական հիմնադրամի մամուլի քարտուղար Ալեքսանդր Կալուգինը։
Ըստ նրա, կինոդպրոցին կմասնակցեն ավելի քան 40 երիտասարդ կինոդրամատուրգներ, ռեժիսորներ, օպերատորներ 13 երկրներից։
Միջազգային կինոդպրոցը կազմակերպվել է Կինեմատոգրաֆիստների միությունների համադաշնության և ՌԴ Պետֆիլմադարանի կողմից՝ ԱՊՀ հումանիտար համագործակցության միջպետական հիմնադրամի անդամ-պետությունների աջակցությամբ։
Կինոդպրոցն արդեն հարթակ է դարձել երիտասարդ կինեմատոգրաֆիստների հանդիպումների համար, կարծում է Կինեմատոգրաֆիստների միությունների համադաշնության նախագահ, Կինոդպրոցի ղեկավար Ռուստամ Իբրահիմբեկովը։
«Այսօր Համագործակցության բազմաթիվ պետություններում կան սեփական կինոդպրոցներ, բայց ամենամեծ դժբախտությունը դրանց մեկուսացվածությունն է միմյանցից։ Մեր Կինոդպրոցը չի հավակնում լիարժեք կրթական կուրսի։ Սակայն կարևոր է հարթակ ստեղծել երիտասարդ կինեմատոգրաֆիստների ծանոթության համար, ովքեր դեռևս պահպանում են շփման մեկ լեզու՝ ռուսերենը»,- ասաց Իբրահիմբեկովը։
Կինոդպրոց-2009-ի շրջանակներում, որը կտևի տասն օր, կանցկացվեն ռեժիսուրայի, խաղարկային և ոչ խաղարկային կինոյի դրամատուրգիայի, եվրասիական կինոյի առաջատար վարպետների թեմատիկ վարպետության դասեր, «Մեր դասականը» խորհրդային բազմազգ կինոյի պատմության դասընթաց (35մմ ժապավենի ցուցադրություն և նախորդող դասախոսություններ), մասնակիցների՝ ԱՊՀ և Բալթյան երկրների ուսանողների և սկսնակ ռեժիսորների ֆիլմերի համայնապատկերային ցուցադրություն։
Երիտասարդ տաղանդների հետ պարապմունքներ կանցկացնեն ամենաականավոր վարպետները՝ Ռուստամ Իբրահիմբեկովը, Ռոման Բալայանը, Վլադիմիր Կլիմովը, Նիկոլայ Լեբեդևը, Վալերի Ռուբինչիկը, Լարիսա Սադիլովան, Ալեքսեյ Գերման կրտսերը, Իգոր Կլեբանովը, Սերգեյ Լավրենտևը, Մարինա Ռազբեժկինան, Լեոնիդ Յարմոլնիկը, Նատալյա Ռյազանցևան, Պավել Ֆիննը, Բախտիյար Խուդոյնազարովը։
Նախորդ տարվա կինոդպրոցի մասնակից Իլոնա Բիչևսկան Լատվիայից մշակել է Համագործակցության երկրներից տաղանդավոր հասակակիցներին համախմբելու «15 երիտասարդներ երիտասարդների մասին» նախագիծը։ Իլոնայի հենց այդ աշխատանքը լավագույնը համարվեց ԱՊՀ երկրների, Լատվիայի, Լիտվայի և Էստոնիայի «Կինոշոկ» կինոյի բաց փառատոնի շրջանակներում ներկայացված համատեղ կինոնախագծերի մրցույթում։
«Հավատում եմ, որ Կինոդպրոցն ազդակ կհաղորդի նոր հետաքրքիր համատեղ նախագծերի ստեղծմանը»,- ասաց Կինոդպրոցի ղեկավար Ռուստամ Իբրահիմբեկովը։ -0-
