Լիբանանում Հայաստանի դեսպանն ու Լիբանանի վարչապետը կարևորել են երկկողմ հարաբերությունները

Լիբանանում Հայաստանի դեսպան Աշոտ Քոչարյանը և Լիբանանի վարչապետ Ֆուադ Սինյորան նախօրեին կայացած հանդիպման ընթացքում կարևորվել են հայ-լիբանանյան բարեկամական հարաբերությունները նոր որակի բարձրացնելու անհրաժեշտությունը:  

Ինչպես երեքշաբթի «Նովոստի-Արմենիա» գործակալությանը հայտնեցին հանրապետության ԱԳՆ մամուլի և տեղեկատվության վարչությունից, ընդգծվել է երկկողմ առևտրատնտեսական հարաբերությունների զարգացումն ու ընդլայնումը, նաև` բարձրաստիճան  պատվիրակությունների փոխայցելությունների, միջկառավարական հանձնաժողովի նիստերի վերսկսման անհրաժեշտությունը:

Զրուցակիցները նշել են, որ իրավապայմանագրային դաշտն ու բազմաթիվ ոլորտներում առկա ներուժը  հնարավորություն են ընձեռում հետագա փոխշահավետ համագործակցության համար:

Անդրադարձ է կատարվել նաև հայ-թուրքական հարաբերությունների կարգավորման գործընթացի վերջին զարգացումներին: -0-