ԵՄ ԱԳ նախարարների խորհրդի նախագահը կոչ արեց արագ վավերացնել հայ-թուրքական արձանագրությունները և կատարել ձեռք բերված պայմանավորվածությունները
ԵՄ ԱԳ նախարարների խորհրդի նախագահ, Շվեդիայի արտգործնախարար Կառլ Բիլդտը ողջունեց հայ-թուրքական արձանագրությունների ստորագրումը և հույս հայտնեց, որ կողմերը դրանք արագորեն կվավերացեն ու կյանքի կկոչեն` հարգելով ձեռք բերված պայմանավորվածությունները:
Ինչպես հայտնում է հայկական ԱԳՆ մամուլի ծառայությունը, այդ մասին Բիլդտը հայտարարեց Լյուքսեմբուրգում Հայաստանի, Վրաստանի և Ադրբեջանի արտգործնախարարներ Էդվարդ Նալբանդյանի, Գրիգոլ Վաշաձեի և Էլմար Մամեդյարովի, ինչպես նաև ԵՀ արտաքին հարաբերությունների և ԵՀՔ հարցերով հանձնակատար Բենիտա Ֆերերո-Վալդների համատեղ մամուլի ասուլիսի ընթացքում։
Ինչպես ասվում է հաղորդագրությունում, Բիլդտը նաև բարձր գնահատեց Հայաստանի և Եվրոպական Միության միջև արձանագրված առաջընթացը։
Իր խոսքում Բենիտա Ֆեռերո-Վալդները կարևորեց 100 մլն եվրոյի չափով ԵՄ կողմից Հայաստանին մակրոէկոնոմիկ աջակցության տրամադրման նախաձեռնությունը` որպես ՀՀ տնտեսական զարգացմանը նպաստող քայլ:
Նա նաև որպես լիակատար հաջողություն բնորոշեց ԵՄ խորհրդատվական խմբի գործունեությունը Հայաստանում:
Ասուլիսից առաջ տեղի ունեցավ Էդվարդ Նալբանդյանի և Եվրոպական միության խորհրդի գլխավոր քարտուղար Խավիեր Սոլանայի հանդիպումը:
Հանդիպման ժամանակ Նալբանդյանն ու Սոլանան քննարկեցին Հայաստան - Եվրոպական Միություն համագործակցության վերաբերյալ մի շարք հարցեր և մտքեր փոխանակեցին տարածաշրջանային զարգացումների շուրջ: -0-
