Ընդդիմադիր թերթի խմբագրի գործով դատավարության մեջ ընդմիջում է հայտարարվել

ԵՐԵՎԱՆ, 26 հոկտեմբերի. /Նովոստի-Արմենիա/. Իշխանության ներկայացուցչի հանդեպ բռնություն գործելու և զանգվածային անկարգություններ կատարելու մեջ մեղադրվող «Հայկական ժամանակ» ընդդիմադիր թերթի խմբագիր Նիկոլ Փաշինյանի գործով դատավարությունում ընդմիջում է հայտարարված մինչև հոկտեմբերի 28-ը:  

Գործի քննության կարգի՝ դատարանի ընդունած որոշման համաձայն՝ Ոստիկանության պարեկային ծառայության աշխատակից, տուժած Վազգեն Դաբաղյանի հարցաքննումից հետո գործընթացում դադար է հայտարարվել մինչև չորեքշաբթի:

Տուժածը հաստատել է նախաքննության ընթացքում տված իր ցուցումները, մասնավոևապես նշելով, որ 2007 թ.-ի հոկտեմբերի 23-ին, երբ վերջինս գտնվել է ծառայության մեջ, ընդդիմության բողոքի ցույցի ժամանակ ծագած ծեծկռտուքի  արդյունքում մեղադրյալ Փաշինյանը հարվածել է իր ոտքին:

Պաշտպանության կողմի միջնորդությամբ և դատարանի որոշմամբ՝ տուժածի հարցաքննումից հետո դատարանը կլսի 2007 թ.-ի հոկտեմբերի 23-ի դրվագով վկաների ցուցումները, իսկ հետո կհարցաքննվեն մարտյան դեպքերի դրվագով վկաները:  

Երկուշաբթի նիստի ժամանակ մեղադրյալ Փաշինյանը հայտարարեց, որ իրեն բացատրեն իրեն ներկայաված մեղադրանքի բովանդակությունը, քանի որ այն պարզ ու որոշակի չէ:   

«Ես մեղադրանքի առնչությամբ իմ դիրքորոշումն ասել չեմ կարող, եթե չեմ հասկանում, թե կոնկրետ որն է իմ մեղքը»,- հայտարարեց Փաշինյանը:

Նրա խոսքերով՝ մեղադրական եզրակացության մեջ թվարկված արարքների ցանկն ու անձնանց ցուցակը մեղադրանքն ավելի քան անհասկանալի են դարձնում: «Անհասկանալի է՝ ով և կոնկրետ ինչում է մեղադրվում»,- հայտարարեց նա: 
 
Փաշինյանի նկատմամբ դատավարությունը սկսվել է երեքշաբթի Երևանի Կենտրոն և Նորք-Մարաշ վարչական տարածքների առաջին ատյանի դատարանում:

Ընդդիմադիր թերթի խմբագիրը մեղադրվում է 2007 թ.-ի հոկտեմբերի 23-ին ոստիկանության աշխատակցի դեմ կյանքին վտանգ չներկայացնող բռնություն կիրառելու և մի խումբ անձանց հետ Երևանում 2008 թ.-ի մարտի 1-2-ին զանգվածային անկարգություններ կազմակերպելու մեջ:--0—