ՄԱՆԱՄԱ, 26 հոկտոմբերի. /Նովոստի-Արմենիա/. Լեռնային Ղարաբաղի մայրաքաղաք Ստեփանակերտի օդանավակայանը պատրաստ կլինի շահագործման 2010 թվականի գարնանից, ասաց հայկական ազգային ավիափոխադրող «Արմավիա» ընկերության սեփականատեր Միխայիլ Բաղդասարովը։
«Մեր տվյալներով` մոտ ժամանակներս՝ մարտ-մայիս ամիսներին, Ստեփանակերտի օդանավակայանը պատրաստ կլինի։ Ինքնաթիռների հետ ևս խնդիրներ չկան։ Լեռնային Ղարաբաղի ղեկավարությունը ցանկանում է, որպեսզի այդ օդանավակայանը համապատասխանի բոլոր համաշխարհային չափանիշներին, և կամենում է լավ նախապատրաստվել նրա գործարկմանը»,- երկուշաբթի լրագրողներին ասաց Բաղդասարովը Բահրեյնի միջազգային օդանավակայանում՝ պատասխանելով «Նովոստի-Արմենիա» գործակալության հարցին։
«Արմավիա» ավիաընկերությունը երկուշաբթի սկսել է կանոնավոր չվերթեր իրականացնել Բահրեյնի Թագավորության մայրաքաղաք Մանամա։
Միաժամանակ «Արմավիայի» սեփականատերը նշեց, որ Ստեփանակերտի օդանավակայանը «հավանաբար կաշխատի առանց մեզ», քանի որ ԼՂՀ-ն ինքնուրույն պետություն է, որը ներկայումս ունի իր ավիացիան։
Բաղդասարովի խոսքերով՝ ԼՂՀ-ում կգործի սեփական օդանավակայանը, իսկ «Արմավիան» կօգնի ավիացիայի զարգացման հարցում։
««Արմավիան» ինքը չի թռչի, Ղարաբաղում կլինի նրա ընկերությունը, որը և կանոնավոր չվերթեր կիրականացնի»,- ասաց նա։
Ավելի վաղ «Արմավիա» ավիաընկերության գլխավոր տնօրեն Նորայր Բելույանը հայտարարել էր, որ «Արմավիա» ավիաընկերությունն աշխատում է դեպի Ստեփանակերտ կանոնավոր չվերթերի բացման ուղղությամբ։
«Արմավիա» ավիաընկերությունը Օդային տրանսպորտի միջագզային ասոցիացիայի (IATA) անդամ է: Ընկերությունն իրականացնում է ամսական մոտ 250 չվերթ 30 ուղղություններով դեպի ԱՊՀ երկրներ, Եվրոպա և Միջին Արևելք: 2008թ.-ին ընկերությունը մոտ 647000 ուղևոր է փոխադրել: --0—
