Մի խումբ ֆրանսիացի բժիշկներ դիտարկում են 10 մլն եվրոյի ներդրման հնարավորությունը Հայաստանում Միջուկային բժշկության կենտրոնի ստեղծման համար, ուրբաթ լրագրողներին հայտնեց Հայաստանի Մրցունակության ազգային հիմնադրամի գործադիր տնօրեն Բեկոր Փափազյանը։
«Այդ գումարի 20 տոկոսն իր վրա է վերցրել նրանց գործընկեր-ներդրողը Հայաստանից»,- ասաց Փափազյանը։
Հայաստանի կառավարությունն ընթացիկ տարվա փետրվարի 19-ին հավանություն է տվել հանրապետությունում Երևանի ֆիզիկայի ինստիտուտի (ԵրՖԻ) հիմքի վրա մոտ 30 մլն եվրո արժողությամբ Միջուկային բժշկության և ուռուցային հիվանդությունների դեմ պայքարի կենտրոնի ստեղծման վերաբերյալ որոշմանը։
Հաստատված ծրագրի շրջանակներում նախատեսվում է Բելգիայից Հայաստան ներկրել ուռուզքային հիվանդությունների ճիշտ ախտորոշման և բուժման համար նախատեսված ռադիոնուկլիդների ցիկլոտրոնային արագացուցիչ, որը թույլ կտա բացահայտել քաղցկեղային նորագոյացությունները դրանց զարգացման վաղ փուլում։
Այդ ծրագրի իրականացումը Հայաստանում ոչ միայն կնպաստի տարածաշրջանային մասշտաբի միջուկային բժշկության ժամանակակից ախտորոշման և բուժկենտրոնի ստեղծմանը, այլ նաև ցիկլոտրոնի շնորհիվ կօգնի լուծումներ գտնել առողջապահական ոլորտների և կիրառական մի շարք ճյուղերին կից բնագավառներում, այդ թվում՝ դեղագործության, բնապահպանության և գյուղատնտեսության հարցերում։ -0-
