Թուրքիան արձանագրությունների վավերացումից առաջ կփորձի Ղարաբաղի հարցում զիջումներ կորզել Հայաստանից. ՀՅԴ

ԵՐԵՎԱՆ, 23 հոկտեմբերի. /Նովոստի-Արմենիա/. Թուրքիան արձանագրությունների վավերացումից առաջ կփորձի Ղարաբաղի հարցում զիջումների հասնել Հայաստանի կողմից, ուրբաթ մամուլի ասուլիսի ժամանակ հայտարարեց ՀՅԴ գերագույն մարմնի ներկայացուցիչ Արմեն Ռուստամյանը։ 

«Կոպիտ ասած՝ իր խնդիրները Թուրքիան լուծել է, մնացել է լուծել Ադրբեջանի խնդիրները»,- նշեց Ռուստամյանը։

Ըստ նրա, արձանագրությունների ստորագրումից հետո Անկարան ակնհայտորեն նախապայմաններ է  առաջ  քաշում Ղարաբաղի վերաբերյալ, որոնք չպետք է ընկալվեն որպես «տեղական օգտագործման հայտարարություններ»։

Միաժամանակ Ռուստամյանն ընդգծեց, որ Թուրքիան արձանագրությունները չվավերացնելու պատճառներ չունի, սակայն, հնարավոր է, նա երկարաձգի վավերացման գործընթացը մինչև 2010 թվականի ապրիլը։ 

«Ինչպես և նախորդ տարի, Թուրքիան կփորձի օգտագործել հայ-թուրքական «բարեկամությունը» ԱՄՆ-ին իր կողմից Ցեղասպանության ճանաչումը դադարեցնող ազդանշան տալու համար»,- ավելացրեց պատգամավորը։

Հայաստանի ու Թուրքիայի արտգործնախարարները հոկտեմբերի 10-ին Ցյուրիխի համալսարանում ստորագրեցին «Դիվանագիտական հարաբերությունների հաստատման մասին արձանագրությունը» և «Երկկողմ հարաբերությունների զարգացման մասին արձանագրությունը»: Ստորագրումից հետո երկու ամսվա ընթացքում փաստաթղթերը պետք է ներկայացվեն խորհրդարաններին վավերացման համար:

Հայաստանի և Թուրքիայի միջև չկան դիվանագիտական հարաբերություններ, իսկ 1993-ից, պաշտոնական Անկարայի նախաձեռնությամբ, փակ է հայ-թուրքական սահմանը։ -0-