Հայաստանի մարդու իրավունքների պաշտպան Արմեն Հարությունյանը կարծում է, որ հանրապետությունում լուրջ խնդիրներ գոյություն ունեն շրջակա միջավայրի պահպանության բանգավառում:
«Այս ոլորտի խնդիրները հիմնականում վերաբերում են ապօրինի անտառահատումներին, անտառների և ազգային պարկերի ոչ նպատակային օգտագործմանը, շինարարական թափոնների առկայութոյանը և հատկապես լեռնահանքային ձեռնարկությունների ոչ պատշաճ վերահսկողությանը»,- ընդգծեց Օմբուդսմենը:
Հարությունյանի խոսքերով՝ Օմբուդսմենի գրասենյակում բազմաթիվ ահազանգեր են ստացվում հասարակական կազմակերպություններից, մասնավորապես, Կապանի մտահոգիչ բնապահպանական վիճակի մասին:
«Հողում, ջրում և սննդամթերքում հայտնաբերվել են ծանր մետաղներ: Նման խախտումները բացասաբար են անդրադառնում իմունային համակարգի և գենոֆոնդի վրա»,- ասաց Մարդու իրավունքների պաշտպանը:
Նա նշեց, որ տեղական բնակչությունը որևէ փոխհատուցում չի ստանում պատճառած վնասի համար: -0-
