Մաքսային միջազգային կազմակերպությունը ցանկանում է Հայաստանը որպես օրինակելի երկիր տեսնել մաքսային բարեփոխումների իրականացման հարցում

ԵՐԵՎԱՆ, 23 հոկտեմբերի. /Նովոստի-Արմենիա/. Մաքսային միջազգային կազմակերպությունը (ՄՄԿ) մտադիր է հասնել նրան, որպեսզի Հայաստանը դառնա օրինակելի երկիր մաքսային բարեփոխումների իրականացման հարցում, ասել է ՄՄԿ-ի գլխավոր քարտուղար Կունիո Միկուրիան:

«Լինելով Հայաստանում և ծանոթանալով նրա լավագույն փորձի հետ՝ մենք մտադիր ենք տարածել դրանք և կիսել դրանք այլ երկրների հետ», - ասել է նա ուրբաթ Երևանում ՀՀ կառավարությանն առընթեր Պետական եկամուտների կոմիտեի նախագահ Գագիկ Խաչատրյանի հետ համատեղ մամուլի ասուլիսի ժամանակ:

Հայաստանը տարածաշրջանի այլ երկրների հետ համեմատելու՝ լրագրողների խնդրանքին ի պատասխան Միկուրիան ասել է, որ տարածաշրջանի բոլոր երկրները ձգտում են արդիականացնել իրենց մաքսային ընթացակարգերը, սակայն յուրաքանչյուր երկիր ունի իր սեփական կառույցը, որը տարբերվում է մյուսներից:

«Մենք նպատակաուղղված ենք բարելավել մաքսային ընթացակարգերը տարածաշրջանային մասշտաբով, քանի որ մաքսային գործն ապահովում է այլ երկրների հետ կապն ու բարելավում է ապրանքաշրջանառությունը», - պարզաբանել է նա:

Հայաստանը 1992 թ.-ից Մաքսային միջազգային կազմակերպության (ՄՄԿ) անդամ է: Հայաստանը ընտրվել է ՄՄԿ մաքսային հարցերի հանձնաժողովի կողմից որպես եվրոպական տարածաշրջանից ՄՄԿ-ի անդամ, ինչը նրան հնարավորություն է տալիս ակտիվ մասնակցել միջազգային մաքսային քաղաքականության ձևավորման գործընթացներին: 2005 թ.-ի նոյեմբերի 28-ին Հայաստանի մաքսային ծառայությունը Պատրաստակամության հուշագիր է ստորագրել համաշխարհային առևտրի անվտանգության և դյուրացման շրջանակային չափորոշիչների ներդրման մասին:

Մաքսային միջազգային կազմակերպությունն այսօր միջազգային միակ կառույցն է, որը դիտարկում է բացառապես մաքսային հարցեր: Այս պահին 174 երկիր ՄՄԿ-ի անդամ է, որոնց կառույցն առաջարկում է կոնվենցիաների և միջազգային այլ գործիքների լայն շրջանակ:-0-