Հայ և ադրբեջանցի պատգամավորները Պետդումայում քննարկեցին երկու երկրների միջև առկա խնդիրները

Հայ և ադրբեջանիցի պատգամավորները ՌԴ Պետական դումայում քննարկել են երկու երկրների միջև գոյություն ունեցող խնդիրները, հաղորդում է Հայաստանի հանրային հեռուստաընկերությունը (ՀՀՀ):

Տեղեկատվության համաձայն՝ նախօրեին տեղի ունեցած հանդիպմանը ներկա էին Ռուսաստանում Հայաստանի և Ադրբեջանի դեսպաններ Արմեն Սմբատյանն ու Փոլադ Բյուլ-Բյուլ օղլին, ինչպես նաև ՌԴ նախագահի միջազգային մշակութային համագործակցության հարցերով հատուկ ներկայացուցիչ Միխայիլ Շվիդկոյը:

Ինչպես ՀՀՀ-ին տված հարցազրույցում հայտարարել է Հայ Յեղափոխական Դաշնակցության խորհրդարանական խմբակցության նախագահ Վահան Հովհաննիսյանը, հանդիպմանը կիրառվել է քննարկումների նոր հայեցակարգ:

Մասնավորապես, նրա խոսքերով, եթե ադրբեջանական կողմը պնդում է, որ հայերի հետ որևէ հարաբերություն չի կարող լինել մինչև ղարաբաղյան հակամարտության վերջնական լուծումը, ապա հայկական կողմը հայտարարում է, որ ղարաբաղյան հարցն առանձին խնդիր է, որը չի լուծվի առանց Ղարաբաղի մասնակցության, իսկ Հայաստանն ու Ադրբեջանը, որպես ինքնավար պետություններ, քննարկման թեմաներ ունեն, և հենց դրանք է անհրաժեշտ քննարկել:

«Հիմնականում դա հաջողվեց: Այսինքն՝ ղարաբաղյան հարցը չի քննարկվել: Ստեփանակերտում հետագա հանդիպումների կազմակերպման մասին չի խոսվել: Մենք խոսել ենք այն մասին, որ հանդիպումները եթե շարունակական լինեն, կանցկացվեն Բաքվում և Երևանում: Օրակարգում հենց հնարավոր շփումների բանաձևերն էին», - ասել է Հովհաննիսյանը:

Հայաստանի Հանրապետական կուսակցությունից ԱԺ պատգամավոր Արա Բաբլոյանի խոսքերով՝ հանդիպման ընթացքում հաջողվել է կուտակված մանր խնդիրներից ավելի բարձր կանգնել՝ հարևանության գոծընթացը որքան հնարավոր է շուտ սկսելու և երկու ժողովուրդների միջև թշնամու կերպարն արմատախիլ անելու համար:

ՀՀԿ-ից մեկ այլ պատգամավոր՝ Հերմինե Նաղդալյանն իր հերթին նշել է, որ քննարկումների ընթացքում փոփոխություններ նկատվեցին հոգեբանական և քաղաքական մոտեցումներում:

«Ադրբեջանի խորհրդարանի մեր գործընկերները փոքր-ինչ նահանջեցին կոշտ մոտեցումներից և փորձեցին ներկայացնել առաջարկներ, որոնք ենթադրում են խաղաղ գործընթացում շփման կետերի որոնում և որևէ փոխգործակցություն», - ասել է նա:-0-