ԱՄՆ պետդեպարտամենտի ներկայացուցիչը նշում է ՀՀ իշխանությունների՝ ժողովրդավարացմանն ուղղված քայլերի կարևորությունը

ԵՐԵՎԱՆ, 21 հոկտեմբերի. /Նովոստի-Արմենիա/. Եվրոպայի և Եվրասիայի հարցերով ԱՄՆ փոխպետքարտուղարի տեղակալ Թինա Քեյդանաուն նշում է ՀՀ իշխանությունների՝ ժողովրդավարացմանն ուղղված քայլերի կարևորությունը, չորեքշաբթի «Նովոստի-Արմենիա» գործակալությանը հայտնեցին Հայաստանում ԱՄՆ դեսպանատան մամուլի ծառայությունից:

Ինչպես նշվում է հաղորդագրության մեջ, Քեյդանաուն Հայաստանում էր  հոկտեմբերի 19-21-ը: Դեսպան Քեյդանաուն քննարկումներ ունեցավ ՀՀ նախագահի, վարչապետի, արտգործնախարարի, պաշտպանության նախարարի, Ազգային ժողովի նախագահի և ընդդիմության ներկայացուցիչների հետ: Նա նաև զրույց ունեցավ քաղաքացիական հասարակության ներկայացաուցիչների, այդ թվում նաև տարածաշրջանային համագործակցության փորձագետների ու մամուլի ներկայացուցիչների հետ:

«Դեսպանը հորդորեց կառավարությանը քայլեր ձեռնարկել, որոնք ի ցույց կդնեն երկրի վճռական վերաբերմունքը ժողովրդավարական առաջընթացի վերաբերյալ»,- ասվում է հաղորդագրության մեջ:

Զրույցների ընթացքում փոխպետքարտուղարի տեղակալ Թինա Քեյդանաուն շոշափեց հարցերի լայն շրջանակ` ԱՄՆ կառավարության աջակցությունը ուղղված հայ-թուրքական հարաբերությունների կարգավորմանը, ինչպես նաև Հայաստանի տնտեսական զարգացման, մարդու իրավունքների և ժողովրդավարությանն ուղղված և ԱՄՆ կողմից ֆինասավորվող ծրագրեր: 

Նա նաև նշեց, որ ԱՄՆ կառավարությունը մեծ աջակցություն է ցուցաբերում Հայաստանին, այդ թվում` Հազարամյակի մարտահրավեր կորպորացիայի միջոցով, որի ֆինանսավորմամբ իրականացվող ծրագրի ավարտին (2010թ.) հատկացված գումարը կկազմի  ավելի քան 180 միլիոն ԱՄՆ դոլար:

Հայաստանից հետո դեսպան Քեյդանաուն կայցելի Վրաստան և Ադրբեջան:-0-